હોળીનો તહેવાર હોય અને ઠંડાઈની વાત ન થાય તેવું તો બને જ નહીં. જોકે, દર વખતે ભાંગની ઠંડાઈ પીધા પછી જો તમારી હાલત પણ ખરાબ થઈ જતી હોય, તો આ વખતે કંઈક નવું ટ્રાય કરો. આ હોળી પર તમે ‘પાન અને ગુલકંદ’માંથી બનેલી રિફ્રેશિંગ ડ્રિંક પીરસી શકો છો. ઠંડાઈની સરખામણીએ આ ડ્રિંક બનાવવું ખૂબ જ સરળ છે અને જો થોડી તૈયારી અગાઉથી કરી લેવામાં આવે, તો મહેમાનો સામે તેને માત્ર 2 મિનિટમાં સર્વ કરી શકાય છે. આ પાન શૉટ્સ તમને હાઇડ્રેટ રાખવાની સાથે લાંબા સમય સુધી એનર્જેટિક પણ રાખશે. ચાલો જાણીએ આ હેલ્ધી અને ટેસ્ટી ડ્રિંકની સ્ટેપ-બાય-સ્ટેપ રેસીપી.
પાન પોષક તત્વોથી ભરપૂર હોય છે. આ ડ્રિંકમાં વરિયાળીનો ઉપયોગ કરવામાં આવે છે જે પાચન માટે ઉત્તમ છે. નાળિયેરનો સ્વાદ અને ગુલકંદની સુગંધ તેને એક શાનદાર ફ્લેવર આપે છે. હોળીના રંગીન માહોલમાં આ વાઈબ્રન્ટ ગ્રીન ડ્રિંક દેખાવમાં પણ ખૂબ આકર્ષક લાગે છે.
- સામગ્રી
પાન: 6-7 નંગ (કલકત્તી અથવા નાગરવેલ)
વરિયાળી: 1 થી 1.5 ચમચી
કોપરાનું છીણ: 2 ચમચી
ઈલાયચી પાવડર: અડધી ચમચી
ગુલકંદ: 2 ચમચી
ખાંડનો પાવડર: ¼ કપ
બરફના ટુકડા: જરૂર મુજબ
ગ્રીન ફૂડ કલર: વૈકલ્પિક
પાનની પેસ્ટ: 3 ચમચી
ઠંડુ દૂધ: ¾ કપ
ફ્રેશ ક્રીમ: ½ કપ
ગાર્નિશિંગ માટે: ઝીણા સમારેલા પિસ્તા, કેસરના તાંતણા અને ગુલાબની સૂકી પાંખડીઓ.
- બનાવવાની રીત
સૌ પ્રથમ પાનને બરાબર ધોઈને તેના ટુકડા કરી લો. તેને મિક્સર જારમાં નાખો. હવે તેમાં વરિયાળી, બરફના ટુકડા અને કોપરાનું છીણ ઉમેરીને પીસી લો. જ્યારે આ મિશ્રણ થોડું પીસાઈ જાય ત્યારે તેમાં ગુલકંદ અને ફૂડ કલર ઉમેરી ફરીથી ગ્રાઇન્ડ કરો જેથી એક સ્મૂધ પેસ્ટ તૈયાર થઈ જાય. આ પેસ્ટને તમે એરટાઈટ કન્ટેનરમાં સ્ટોર કરી શકો છો. હોળીના આગલા દિવસે આ પેસ્ટ બનાવી લેવાથી તહેવારના દિવસે તમારો સમય બચશે. જ્યારે મહેમાનો ઘરે આવે ત્યારે એક ગ્લાસ અથવા મિક્સર જારમાં 2 ચમચી તૈયાર કરેલી પાન પેસ્ટ લો. તેમાં જરૂર મુજબ દળેલી ખાંડ, એકદમ ઠંડુ દૂધ અને ફ્રેશ ક્રીમ ઉમેરો. હવે તેને હેન્ડ બ્લેન્ડર અથવા મિક્સરની મદદથી બરાબર મિક્સ કરી લો. તૈયાર થયેલા આ ક્રીમી પાન શૉટ્સને નાના ગ્લાસમાં કાઢો. ઉપરથી પિસ્તાની કાતરી અને ગુલાબની સૂકી પાંખડીઓ ભભરાવીને ઠંડુ-ઠંડુ સર્વ કરો.
