બેંગ્લોરઃ હાસન જિલ્લાના હોલેનારસીપુરામાં એક ફાર્મહાઉસમાં નોકરાણી પર બળાત્કારના કેસમાં બેંગલુરુમાં વિશેષ અદાલત દ્વારા જેડીએસ પૂર્વ નેતા અને ભૂતપૂર્વ લોકસભા સાંસદ પ્રજ્વલ રેવન્નાને દોષિત ઠેરવવામાં આવ્યો છે. હાસનના ભૂતપૂર્વ સાંસદ પ્રજ્વલ રેવન્ના વિરુદ્ધ કોર્ટે ચુકાદો સંભળાવતા જ તેઓ કોર્ટમાં જ ભાવુક થઈ ગયા અને રડવા લાગ્યા હતા. એફઆઈઆર નોંધાયાના 14 મહિના પછી જ આ ચુકાદો આપવામાં આવ્યો છે. કોર્ટ 2 ઓગસ્ટના રોજ સજાનો આદેશ કરશે.
પૂર્વ સાંસદ પ્રજ્વલ રેવન્ના ભૂતપૂર્વ વડા પ્રધાન એચડી દેવગૌડાના પૌત્ર અને ભૂતપૂર્વ મુખ્ય પ્રધાન એચડી કુમારસ્વામીના ભત્રીજા છે. તેમના પર જાતીય હિંસા અને બળાત્કારના ચાર અલગ અલગ કેસોમાં ગંભીર આરોપો છે. 28 એપ્રિલથી 10 જૂન 2024 વચ્ચે 4 એફઆઈઆર નોંધાઈ હતી. આ કેસ હાસન જિલ્લાના હોલેનારસીપુરા પોલીસ સ્ટેશનમાં નોંધાયા હતા. 2 સાયબર ક્રાઈમ કેસમાંથી એક સીઆઈડી હેઠળ સાયબર ક્રાઈમ પોલીસ સ્ટેશનમાં નોંધાયો હતો.
આ કેસમાં એક કથિત પોર્નોગ્રાફિક વીડિયો સામે આવ્યો હતો, જેના માટે કોર્ટે ટેકનિકલ સ્પષ્ટતા માંગી હતી. કોર્ટે સ્પષ્ટતા કરવી પડી હતી કે આ વીડિયો પ્રજ્વલ રેવન્નાના મોબાઇલથી તેના ડ્રાઇવર કાર્તિકના મોબાઇલમાં કેવી રીતે ટ્રાન્સફર થયો. CID હેઠળ રચાયેલી સ્પેશિયલ ઇન્વેસ્ટિગેશન ટીમ (SIT) એ હવે કોર્ટમાં આ અંગેનો વિગતવાર ફોરેન્સિક રિપોર્ટ રજૂ કર્યો છે. રિપોર્ટમાં ટ્રાન્સફરના ડિજિટલ લોગ, વીડિયોનું મેટાડેટા વિશ્લેષણ, વોટ્સએપ/બ્લુટુથ જેવા માધ્યમોની ટેકનિકલ પુષ્ટિનો સમાવેશ થાય છે.
માત્ર પ્રજ્વલ જ નહીં, તેના પિતા એચડી રેવન્ના, જે હાલમાં હોલેનરાસીપુરાના ધારાસભ્ય છે. તેમની સામે કેઆર નગર પોલીસ સ્ટેશનમાં એક અલગ કેસ નોંધવામાં આવ્યો છે. આ કેસ પુરાવા સાથે છેડછાડ, ધમકીઓ અથવા સહ-ગુનામાં સંડોવણી સાથે સંબંધિત હોઈ શકે છે.