રક્ષા મંત્રી રાજનાથ સિંહે ઓસ્ટ્રેલિયાના નાયબ વડાપ્રધાનને ફોન કર્યો,બંને નેતાઓએ આ મુદ્દાઓ પર કરી ચર્ચા  

દિલ્હી:રક્ષા મંત્રી રાજનાથ સિંહે ગુરુવારે પોતાના ઓસ્ટ્રેલિયન સમકક્ષ રિચર્ડ માર્લ્સ સાથે વાત કરી હતી.આ દરમિયાન, બંને નેતાઓએ દ્વિપક્ષીય સંરક્ષણ સંબંધોને મજબૂત કરવા માટે બંને પક્ષોની પ્રતિબદ્ધતાનો પુનરોચ્ચાર કર્યો હતો.આ ટેલિફોનિક વાતચીત વડાપ્રધાન નરેન્દ્ર મોદી અને તેમના ઓસ્ટ્રેલિયન સમકક્ષ એન્થોની અલ્બેનીઝ વચ્ચે દિલ્હીમાં વાતચીતના એક દિવસ પહેલા થઈ હતી.

સિંહે ટ્વીટ કર્યું, “ઓસ્ટ્રેલિયન નાયબ વડાપ્રધાન અને રક્ષામંત્રી રિચર્ડ માર્લ્સ સાથે વાત કરી. ભારત અને ઓસ્ટ્રેલિયા વ્યાપક વ્યૂહાત્મક ભાગીદારી ધરાવે છે અને આજની વાતચીત આપણા સંરક્ષણ સહયોગને વધુ મજબૂત બનાવવાની અમારી પ્રતિબદ્ધતાને પુનરાવર્તિત કરવાની તક હતી.” સંરક્ષણ મંત્રાલયે જણાવ્યું હતું કે બંને પ્રધાનોએ દ્વિપક્ષીય સંરક્ષણ સંબંધોને વધુ મજબૂત કરવા માટે તેમની પ્રતિબદ્ધતાનો પુનરોચ્ચાર કર્યો હતો.

મંત્રાલયે જણાવ્યું હતું કે ફોન પરની વાતચીતમાં બંને દેશો વચ્ચેનો વિશ્વાસ અને મિત્રતા પ્રતિબિંબિત થાય છે, ખાસ કરીને સંરક્ષણ અને સુરક્ષાને લગતી બાબતોમાં.ઓસ્ટ્રેલિયા આ વર્ષના અંતમાં માલાબાર નેવલ એક્સરસાઇઝનું આયોજન કરશે.તેમાં ભારત, ઓસ્ટ્રેલિયા, જાપાન અને અમેરિકાની નેવી સામેલ થશે.