વડોદરા,12 જાન્યુઆરી 2026: શહેરમાં ડ્રિંક એન્ડ ડ્રાઈવના બનાવો વધતા જાય છે. ત્યારે શહેરના ગેંડા સર્કલ ખાતે આવેલા સારાભાઈ કેમ્પસમાં એક મહિલા કારચાલકે નશામાં ધૂત હાલતમાં ફુલ સ્પીડે કાર ચલાવીને અકસ્માત સર્જ્યો હતો અને દીવાલ સાથે કાર અથડાઈ હતી. ઘટનાની જાણ થતાં ગોરવા પોલીસ ઘટનાસ્થળે દોડી ગઈ હતી અને મહિલાની ધરપકડ કરીને વધુ તપાસ શરૂ કરી છે.
આ બનાવની વિગત એવી છે કે, શહેરના ગેંડા સર્કલ ખાતે આવેલા સારાભાઈ કેમ્પસમાં આ દુર્ઘટના બની હતી. મહિલાચાલકે ફુલ સ્પીડમાં કાર ચલાવતી વખતે કંટ્રોલ ગુમાવ્યો અને અકસ્માત કર્યો હતો. ઘટનાને પગલે આસપાસના લોકોના ટોળેટોળાં એકત્ર થઈ ગયા હતા. લોકોએ તુરંત જ પોલીસને જાણ કરી હતી. આ સમયે હાજર લોકોમાં કારચાલક મહિલા સામે ભારે રોષ જોવા મળ્યો હતો. દરમિયાન ગોરવા પોલીસ સ્ટેશનની ટીમ તાત્કાલિક ઘટનાસ્થળે પહોંચી હતી. પ્રાથમિક તપાસમાં જાણવા મળ્યું કે, મહિલાચાલક દારૂ પીધેલી હાલતમાં હતી અને તેને પૂરેપૂરો હોશ પણ નહોતો. જેથી પોલીસે ડ્રિંક એન્ડ ડ્રાઇવનો ગુનો નોંધી મહિલાચાલકને ઝડપી પોલીસ સ્ટેશન ખાતે લઈ જવામાં આવી હતી. આ મામલે ગોરવા પોલીસે મહિલાની ધરપકડ કરીને વધુ તપાસ શરૂ કરી છે.
ઉલ્લેખનીય છે કે, વડોદરા શહેરમાં છેલ્લા ઘણા સમયથી ડ્રિંક એન્ડ ડ્રાઇવની ઘટનાઓ સામે આવી રહી છે. ઘણા અકસ્માતોમાં લોકો જીવ પણ ગુમાવે છે. તેમ છતાં લોકો ડ્રિંક કરીને વાહન ચલાવે છે અને પોતાના અને બીજા લોકોના જીવ જોખમમાં મૂકે છે.