બેંગ્લુરુઃ નાર્કોટિક્સ કંટ્રોલ બ્યુરો (NCB) એ ગયા મહિને રૂ. 2,000 કરોડના ડ્રગ સ્મગલિંગ રેકેટનો પર્દાફાશ કર્યા પછી, એજન્સીને હવે બીજી મોટી સફળતા મળી છે. આ કેસમાં દ્રવિડ મુનેત્ર કઝગમ (DMK)ના ભૂતપૂર્વ અધિકારી અને તમિલ ફિલ્મ નિર્માતા જાફર સાદિકની ધરપકડ કરી છે. NCBના ડેપ્યુટી ડાયરેક્ટર જનરલ (ઓપરેશન્સ) જ્ઞાનેશ્વર સિંહે કહ્યું કે, “તે ભારત-ઓસ્ટ્રેલિયા-ન્યૂઝીલેન્ડ ડ્રગ ટ્રાફિકિંગ નેટવર્કનો કિંગપિન છે, જેની અમે તપાસ કરી રહ્યા હતા. અમે ટૂંક સમયમાં તેની વિગતો શેર કરીશું.” NCB અધિકારીઓના જણાવ્યા અનુસાર, સાદિક એક અગ્રણી ફિલ્મ નિર્માતા છે જેમણે ઘણી ફિલ્મોનું નિર્માણ અથવા સહ-નિર્માણ કર્યું છે. તેમની પાંચમી ફિલ્મ આ મહિનાના અંતમાં રિલીઝ થવાની છે.
NCBના એક અધિકારીએ કહ્યું કે અમે તપાસ કરી રહ્યા છીએ કે ડ્રગના પૈસા તેની પ્રોડક્શન કંપનીમાં વપરાયા હતા કે કેમ. તે છેલ્લા બે અઠવાડિયાથી ગુમ હતા. ડ્રગ્સ રેકેટમાં જાફરની કથિત સંડોવણી સામે વિરોધ પક્ષોએ જોરદાર વિરોધ કર્યો હતો. અખિલ ભારતીય અન્ના દ્રવિડ મુનેત્ર કઝગમ (AIADMK)ના મહાસચિવ અને વિપક્ષી નેતા ઈડાપ્પડી કે પલાનીસ્વામીએ મુખ્ય પ્રધાન એમકે સ્ટાલિન પાસે આ અંગે જવાબ માંગ્યો હતો કે કેવી રીતે પાર્ટીના નેતા ડ્રગ્સ રેકેટનો કિંગપિન છે. દરમિયાન, પલાનીસ્વામીએ જાહેરાત કરી હતી કે તેઓ આટલી મોટી કાર્ટેલ ચલાવવામાં જાફરની કથિત ભૂમિકા અંગે 12 માર્ચે રાજ્યભરમાં વિરોધ પ્રદર્શન કરશે.
