નવી દિલ્હી, 19 ઓક્ટોબર 2026: ડિરેક્ટોરેટ ઓફ રેવન્યુ ઈન્ટેલિજન્સ (DRI) એ સરદાર વલ્લભભાઈ પટેલ આંતરરાષ્ટ્રીય એરપોર્ટ, અમદાવાદ અને સુરત આંતરરાષ્ટ્રીય એરપોર્ટ દ્વારા ભારતમાં વિદેશી મૂળનું સોનું લાવતી એક સંગઠિત ગોલ્ડ સ્મગલિંગ (સોનાની તસ્કરી) સિન્ડિકેટનો પર્દાફાશ કર્યો છે. કસ્ટમ્સ એક્ટ, 1962 હેઠળ ત્રણ વ્યક્તિઓની ધરપકડ કરવામાં આવી છે.
ચોક્કસ બાતમીના આધારે કાર્યવાહી કરીને, ડીઆરઆઈના અધિકારીઓએ શંકાસ્પદો પર નજર રાખી હતી અને 16 ઓક્ટોબર 2026 થી શરૂ કરીને 42 કલાક સુધી સંકલિત દરોડા પાડ્યા હતા. આ ઓપરેશનમાં આ રેકેટની સંપૂર્ણ શ્રૃંખલા ખુલ્લી પડી હતી: હવાઈ મુસાફરો દ્વારા તસ્કરી, હેન્ડલર્સને સોંપણી, ગેરકાયદેસર રીતે ઓગાળવું, અને જ્વેલરી આઉટલેટ દ્વારા વેચાણ. આમાં આશરે રૂ. 19.41 કરોડની કિંમતના 13.017 કિલો વિદેશી મૂળના સોનાના સોદા ખુલ્લા પડ્યા હતા અને ત્રણ વ્યક્તિઓની ધરપકડ કરવામાં આવી છે.
પ્રાથમિક તપાસમાં જાણવા મળ્યું છે કે મુસાફરો દ્વારા સોનું છુપાવવાની અનોખી પદ્ધતિઓનો ઉપયોગ કરીને દેશમાં સોનાની તસ્કરી કરવામાં આવતી હતી. જેમાં રોડિયમ કોટેડ સોનાના પાતળા વાયર, ટ્રોલી બેગની અંદરના લાઇનિંગમાં જડેલું સોનું અને બેગના અંદરના ભાગમાં છુપાવેલી ગોલ્ડ પેસ્ટનો સમાવેશ થાય છે. આગમન પછી, આ સોનું એરપોર્ટની બહાર હેન્ડલર્સને સોંપવામાં આવતું હોવાનો આક્ષેપ છે અને મધ્યસ્થીઓ દ્વારા વડોદરા સ્થિત સોનું ઓગાળવાની એક ગેરકાયદેસર સુવિધા (યુનિટ) સુધી પહોંચાડવામાં આવતું હતું. ત્યારબાદ ઓગાળવામાં આવેલું સોનું રોકડ સામે વેચાણ માટે અમદાવાદની એક જ્વેલરી શોપમાં સપ્લાય કરવામાં આવતું હતું.
આ સંકલિત ઓપરેશનના પરિણામે આશરે 890 ગ્રામ સોનું જપ્ત કરવામાં આવ્યું હતું અને 6.41 કિલો ગેરકાયદેસર રીતે ઓગાળેલા સોના સંબંધિત ગુનાહિત પુરાવા રિકવર કરવામાં આવ્યા હતા. જ્વેલરી શોપ પર વધુ તપાસ દરમિયાન બિનહિસાબી વિદેશી મૂળના સોનાના બિસ્કિટ (બાર્સ) અને દુબઈ સ્થિત સિન્ડિકેટના મુખ્ય ફાયનાન્સર સાથે જોડાયેલા એક અલગ હેન્ડલર દ્વારા મોકલવામાં આવેલા આશરે 5.8 કિલો તસ્કરી કરેલા સોનાના સોદા સંબંધિત રેકોર્ડ્સ રિકવર કરવામાં આવ્યા હતા.
આ ઓપરેશને તસ્કરી કરેલા સોનાની હેરફેર અને નિકાલને સુગમ બનાવવામાં મુસાફરો, હેન્ડલર્સ, મધ્યસ્થીઓ, સોનું ઓગાળવાની સુવિધાના ઓપરેટર અને જ્વેલરી ટ્રેડ ચેનલની પરસ્પર જોડાયેલી ભૂમિકાઓનો ખુલાસો કર્યો હતો. તપાસ દરમિયાન હેન્ડલર/ફાયનાન્સર, મેલ્ટિંગ ફેસિલિટીના ઓપરેટર અને અન્ય મુખ્ય વ્યક્તિઓની ઓળખ કરવામાં આવી હતી. કસ્ટમ્સ એક્ટ, 1962 ની જોગવાઈઓ હેઠળ ત્રણ વ્યક્તિઓની ધરપકડ કરવામાં આવી છે.
આ ઓપરેશન છુપાવવાની પદ્ધતિઓ અને એરપોર્ટની ગતિવિધિથી લઈને સ્થાનિક બજારમાં ઓગાળવા, ફાઇનાન્સિંગ અને વેચાણ સુધીની દરેક કડીને લક્ષ્ય બનાવીને સંગઠિત સોનાની તસ્કરીના નેટવર્કને તોડી પાડવાના ડીઆરઆઈ (DRI) ના કેન્દ્રિત પ્રયાસોને રેખાંકિત કરે છે.
