‘હું નાર્કો ટેસ્ટ માટે તૈયાર છું,પરંતુ કુસ્તીબાજોએ પણ આ ટેસ્ટ કરાવો જોઈએ’- બ્રિજભૂષણ સિંહ
દિલ્હી:કુસ્તીબાજો અને WFI -તેના ચીફ બ્રિજભૂષણ શરણ સિંહ વચ્ચેની લડાઈ જાન્યુઆરી 2023 થી ચાલુ છે. આ પછી, ગત એપ્રિલમાં, કુસ્તીબાજો ખુલ્લેઆમ WFI ચીફ સામે આવ્યા અને તેમના પર યૌન શોષણનો આરોપ લગાવ્યો. સુપ્રીમ કોર્ટના હસ્તક્ષેપ પર દિલ્હી પોલીસે બ્રિજ ભૂષણ વિરુદ્ધ પોક્સો એક્ટ અને અન્ય સંબંધિત કલમો હેઠળ કેસ નોંધ્યો છે. બીજી તરફ, કુસ્તીબાજોએ નક્કી કર્યું છે કે જે દિવસે નવી સંસદનું ઉદ્ઘાટન થશે તે દિવસે કુસ્તીબાજો સંસદની બહાર મહિલા મહાપંચાયતનું આયોજન કરશે. મહેમમાં આયોજિત ખાપ પંચાયતમાં આ નિર્ણય લેવામાં આવ્યો છે. બીજી તરફ WFIના પૂર્વ પ્રમુખે નાર્કો ટેસ્ટને લઈને પ્રતિક્રિયા આપી છે.
વિવાદ વચ્ચે WFI પ્રમુખ રહેલા બ્રિજ ભૂષણ શરણ સિંહનું એક મોટું નિવેદન સામે આવ્યું છે. બ્રિજભૂષણ શરણ સિંહે પોતાના ફેસબુક એકાઉન્ટ પર કહ્યું કે, ‘હું મારો નાર્કો ટેસ્ટ, પોલીગ્રાફી ટેસ્ટ કે લાઈ ડિટેક્ટર કરાવવા માટે તૈયાર છું, પરંતુ મારી શરત એ છે કે મારી સાથે વિનેશ ફોગાટ અને બજરંગ પુનિયાએ પણ આ ટેસ્ટ કરાવવો જોઈએ. જો બંને કુસ્તીબાજો તેમનો ટેસ્ટ કરાવવા તૈયાર હોય તો પ્રેસને બોલાવીને તેની જાહેરાત કરો અને હું તેમને વચન આપું છું કે હું પણ તેના માટે તૈયાર છું. હું હજુ પણ મારા વચન પર અડગ છું અને દેશવાસીઓને કાયમ અડગ રહેવાનું વચન આપું છું. રઘુકુલની પરંપરા હંમેશા રહી છે, પ્રાણ જાયે પણ વચન ન જાય… જય શ્રીરામ.
પંચાયતમાં નિર્ણય લેવામાં આવ્યો છે કે 28 મેના રોજ કુસ્તીબાજો નવી સંસદની બહાર મહિલા મહાપંચાયતનું આયોજન કરશે. પંચાયત દરમિયાન એવું પણ નક્કી કરવામાં આવ્યું હતું કે જંતર-મંતર પર બ્રિજભૂષણ શરણ સિંહની ધરપકડના વિરોધમાં કુસ્તીબાજોની વર્તમાન હડતાળના 1 મહિનાના અવસર પર 23 મેના રોજ ઈન્ડિયા ગેટ સુધી કેન્ડલ માર્ચ કાઢવામાં આવે. હકીકતમાં, 23 મેના રોજ કુસ્તીબાજોના ધરણાને એક મહિનો પૂર્ણ થશે.
આ પહેલા 7 મેના રોજ દિલ્હીના જંતર-મંતર ખાતે ખાપ પંચાયત પણ યોજાઈ હતી, જેમાં સરકારને બ્રિજ ભૂષણની ધરપકડ કરવા માટે 15 દિવસનું અલ્ટીમેટમ આપવામાં આવ્યું હતું. ખાપ પંચાયતમાં કુસ્તીબાજોના મુદ્દે સરકારને 21 મે સુધીમાં પગલાં લેવાનું અલ્ટીમેટમ આપતાં કહેવામાં આવ્યું હતું કે, જો કાર્યવાહી નહીં થાય તો પછી મોટું આંદોલન કરવામાં આવશે.
