નવી દિલ્હીઃ ઇન્સ્ટન્ટ મેસેજિંગ એપ વોટ્સએપ પર ફ્રોડ કોલ્સ અથવા મેસેજ ડિટેક્ટ કરવાનું વધુ સરળ બનશે. ટ્રુકોલર સપોર્ટ ટૂંક સમયમાં WhatsApp પર ઉપલબ્ધ થવા જઈ રહ્યું છે. આની મદદથી યુઝર્સને કોલર આઇડેન્ટિફિકેશન સર્વિસનો સપોર્ટ મળશે અને તેઓ છેતરપિંડી કોલ, સ્પામ કોલ અથવા મેસેજ વિશે અગાઉથી સાવધાન થઈ શકશો. બંને કંપનીઓએ આ સુવિધા માટે ભાગીદારી કરી છે.
ટ્રુકોલર ટૂંક સમયમાં જ તેની કોલર ઓળખ સેવા WhatsApp અને અન્ય મેસેજિંગ એપ્સ પર ઉપલબ્ધ કરાવવાનું શરૂ કરશે જેથી વપરાશકર્તાઓને ઇન્ટરનેટ પર સંભવિત સ્પામ કૉલ્સ શોધવામાં મદદ મળી શકે. કંપનીએ પોતે આ અંગે માહિતી આપી છે. Truecallerના સહ-સ્થાપક અને CEO એલન મામેદીએ જણાવ્યું હતું કે, આ સુવિધા હાલમાં બીટામાં છે અને મેના અંત સુધીમાં વૈશ્વિક સ્તરે રોલઆઉટ કરવામાં આવશે.
ફોન કોલની સાથે હવે વોટ્સએપ પર સ્પામ કોલ અને મેસેજની સંખ્યામાં પણ વધારો થયો છે. અજાણ્યા નંબરને ઓળખવા માટે પણ યુઝર્સને ઘણો સંઘર્ષ કરવો પડે છે. કોલર આઇડેન્ટિફિકેશન સર્વિસ યુઝર્સને આવા કોલ અને મેસેજને ઓળખવામાં મદદ કરશે. Truecallerના અહેવાલ મુજબ, ભારત જેવા દેશોમાં ટેલિમાર્કેટિંગ અને સ્કેમિંગ કૉલ્સ વધી રહ્યા છે, જ્યાં વપરાશકર્તાઓ દર મહિને સરેરાશ 17 સ્પામ કૉલ મેળવે છે. “છેલ્લા બે અઠવાડિયામાં, અમે WhatsApp પર સ્પામ કૉલ્સ વિશે ભારતમાંથી આવતા વપરાશકર્તાઓના અહેવાલોમાં વધારો જોયો છે,” મામેડીએ જણાવ્યું હતું કે, ટેલિમાર્કેટર્સનું ઈન્ટરનેટ કૉલિંગ પર સ્વિચ કરવું બજારમાં એકદમ નવું હતું.
WhatsApp ભારતમાં સૌથી વધુ ઉપયોગમાં લેવાતું મેસેજિંગ પ્લેટફોર્મ છે. કંપનીનું કહેવું છે કે, તે અસામાન્ય વર્તણૂકમાં સામેલ ખાતાઓને ઓળખવા અને તેના પર પગલાં લેવા માટે સ્પામ ડિટેક્શન ટેક્નોલોજીનો ઉપયોગ કરશે. આ સાથે, વપરાશકર્તાઓને આ એકાઉન્ટ્સને બ્લોક કરવા અને તેની જાણ કરવામાં પણ મદદ કરવામાં આવશે.
