નવી દિલ્હી, 19 જુલાઈ 2026: રાષ્ટ્રપતિ દ્રૌપદી મુર્મુ આજે મોલ્ડોવા, ઉત્તર મેસેડોનિયા અને રોમાનિયાની ત્રણ દેશોની મુલાકાત માટે રવાના થયાં. આ પ્રવાસના પ્રથમ તબક્કામાં રાષ્ટ્રપતિ મુર્મુ મોલ્ડોવા પહોંચશે. કોઈ ભારતીય રાષ્ટ્રપતિની મોલ્ડોવાની આ સૌપ્રથમ મુલાકાત હશે. મુલાકાત દરમિયાન, તેઓ મોલ્ડોવાના રાષ્ટ્રપતિ માયા સાન્દુ સાથે પ્રતિનિધિ મંડળ સ્તરની વાતચીત કરશે. તેઓ મોલ્ડોવાની સંસદના સ્પીકર ઇગોર ગ્રોસુને પણ મળશે. આ ઉપરાંત, રાષ્ટ્રપતિ મોલ્ડોવા-ભારત સંસદીય મિત્રતા જૂથના સભ્યો સાથે સંવાદ કરશે. તેઓ ભારત-મોલ્ડોવા બિઝનેસ ફોરમમાં સંબોધન કરશે અને ભારતીય સમુદાયના સભ્યોને પણ મળશે.
તેમની મુલાકાતના બીજા તબક્કામાં, રાષ્ટ્રપતિ મુર્મુ 21 થી 22 જુલાઈ દરમિયાન ઉત્તર મેસેડોનિયાની મુલાકાત લેશે. ઉત્તર મેસેડોનિયાની મુલાકાત લેનારા તેઓ ભારતના પ્રથમ રાષ્ટ્રપતિ હશે. આ મુલાકાત દરમિયાન, તેઓ રાષ્ટ્રપતિ સિલજાનોવસ્કા-દાવકોવા સાથે દ્વિપક્ષીય વાટાઘાટો કરશે. તેઓ વડાપ્રધાન અને સંસદના અધ્યક્ષને પણ મળશે તેમજ ઉત્તર મેસેડોનિયાની વિધાનસભાને સંબોધિત કરશે. રાષ્ટ્રપતિ ‘ઈન્ડિયા-નોર્થ મેસેડોનિયા બિઝનેસ ફોરમ’ને પણ સંબોધિત કરશે. બંને દેશોએ કૃષિ, ફાર્માસ્યુટિકલ્સ, વિજ્ઞાન અને ટેકનોલોજી, માહિતી ટેકનોલોજી અને IT-સક્ષમ સેવાઓ જેવા અગ્રતા ધરાવતા ક્ષેત્રોમાં આર્થિક સહયોગને વધુ મજબૂત બનાવવામાં ઊંડો રસ વ્યક્ત કર્યો છે.
રાષ્ટ્રપતિ મુર્મુ તેમની ત્રણ દેશોની યાત્રાના અંતિમ તબક્કા દરમિયાન ૨૩ થી ૨૫ જુલાઈ સુધી રોમાનિયાની મુલાકાત લેશે. ત્રણ દાયકાથી વધુ સમયમાં કોઈ ભારતીય રાષ્ટ્રપતિની આ દક્ષિણ-પૂર્વ યુરોપિયન દેશની આ પ્રથમ મુલાકાત હશે. મુલાકાત દરમિયાન, તેઓ રોમાનિયાના રાષ્ટ્રપતિ, કાર્યકારી વડાપ્રધાન, સેનેટના પ્રમુખ અને રોમાનિયા-ભારત સંસદીય મિત્રતા જૂથના સભ્યોને મળશે. તેઓ ‘ઈન્ડિયા-રોમાનિયા બિઝનેસ ફોરમ’ને સંબોધિત કરશે અને ભારતીય સમુદાયના સભ્યો સાથે સંવાદ પણ કરશે.
આ મુલાકાતને આ ત્રણ દેશો સાથેના ભારતના દ્વિપક્ષીય સંબંધોને નવી ગતિ આપવા તેમજ વેપાર, રોકાણ, ટેકનોલોજી, નવીનતા, શિક્ષણ અને લોકો વચ્ચેના સંપર્કોના ક્ષેત્રોમાં સહયોગને વધુ વિસ્તારવા માટે મહત્વપૂર્ણ માનવામાં આવે છે.
