બેંગલુરુ, 26 ઓગસ્ટ 2026: ઉત્તર કર્ણાટકના વિજયાપુરા શહેરમાંથી એક એવી ઘટના સામે આવી છે જેનાથી સમગ્ર વિસ્તારમાં ચકચાર મચી ગઈ છે. બુધવારે વિજયાપુરાના બાહ્ય વિસ્તારમાં આવેલા ભૂતનાલ તળાવમાંથી એક માતા અને તેના પાંચ બાળકોના મૃતદેહ મળી આવ્યા હતા. આ કિસ્સો આત્મહત્યાનો હોઈ શકે છે; જોકે, મૃત્યુનું કારણ હજુ સુધી જાણી શકાયું નથી.
પોલીસ તપાસ કરી રહી છે કે આ છ વ્યક્તિઓએ આત્મહત્યા કરી હતી કે તેઓ કોઈ ગુનાનો ભોગ બન્યા હતા. મૃતકોની ઓળખ શોભા જલગેરી અને તેમના બાળકો વિદ્યા (14), સુવર્ણા (14), ગૌદેશ (10), વિકાસ (5) અને સાનિકા (7) તરીકે કરવામાં આવી છે. આ પરિવાર વિજયપુરા જિલ્લાના ટિકોટા તાલુકાના તોરાવી ગામનો રહેવાસી હતો.
5 બાળકો સહિત 6 લોકોના મોત
વિજયપુરાના પોલીસ અધિક્ષક (SP) લક્ષ્મણ નિમ્બર્ગીએ જણાવ્યું હતું કે, “બુધવારે સવારે લગભગ 8:45 વાગ્યે પોલીસને માહિતી મળી હતી કે ભૂતનાલ તળાવમાં છ મૃતદેહો તરતા જોવા મળ્યા છે. પોલીસ જવાનો અને અગ્નિશમન તથા કટોકટી સેવાઓના કર્મચારીઓ તાત્કાલિક ઘટનાસ્થળે પહોંચ્યા હતા અને મૃતકોની ઓળખ કરવાના પ્રયાસો શરૂ કર્યા હતા.”
પોલીસ અધિક્ષકે વધુમાં જણાવ્યું હતું કે, “પ્રાથમિક તપાસમાં જાણવા મળ્યું છે કે સોમવારે વિજયપુરા ગ્રામ્ય પોલીસ સ્ટેશનમાં આ છ વ્યક્તિઓ અંગે ગુમ થયાનો કેસ નોંધવામાં આવ્યો હતો. આ ફરિયાદ શોભાના પતિ ભીમરાય દ્વારા દાખલ કરવામાં આવી હતી.”
તપાસમાં બહાર આવ્યું છે કે 24 ઓગસ્ટે શોભાનો તેના પતિ સાથે ઝઘડો થયો હતો. એવું જાણવા મળ્યું છે કે તેણે તેના પતિને કહ્યું હતું કે તે ઘર છોડીને પોતાના બાળકો સાથે આત્મહત્યા કરી લેશે.
એસપીએ વધુમાં જણાવ્યું હતું કે ઝઘડા બાદ શોભા સવારે લગભગ ૬ વાગ્યે ઘર છોડીને નીકળી હતી અને શરૂઆતમાં પોતાની સાથે ચાર બાળકોને લઈ ગઈ હતી. બાદમાં, તે એક નિવાસી શાળાએ ગઈ હતી જ્યાં તેનો બીજો પુત્ર જે સાંભળવાની ક્ષતિ ધરાવતો હતો. અભ્યાસ કરતો હતો, અને તેને પણ પોતાની સાથે લઈ ગઈ હતી.
પોલીસે પરિવારની અવરજવરનો પત્તો લગાવવાનો પ્રયાસ કર્યો, પરંતુ તેમનું સ્થાન જાણી શકી નહીં, કારણ કે શોભા તેનો મોબાઈલ ફોન ઘરે જ મૂકી ગઈ હતી.
વધુ વાંચો: અમેરિકા: મોન્ટાનામાં એક વ્યક્તિએ પરિવારના ચાર બાળકો સહિત આઠ સભ્યોની ગોળી મારીને હત્યા કરી
