સ્ટ્રીટ સ્ટાઈલ મસાલેદાર પનીર ગોટાલા હવે ઘરે બનાવો, જાણો રેસીપી

જો તમને સ્ટ્રીટ ફૂડ અને બટરથી ભરપૂર મસાલેદાર ગ્રેવી ભાવતી હોય, તો ‘પનીર ગોટાલા’ તમારા માટે શ્રેષ્ઠ વિકલ્પ છે. પ્રખ્યાત શેફ રણવીર બરાર આ વાનગીને એક ખાસ રીતે તૈયાર કરે છે, જેમાં મસાલાને ધીમી આંચ પર શેકવા અને શાકભાજીની જૂસીનેસ (રસદારપણું) જાળવી રાખવી સૌથી મહત્વની છે. આ વાનગી ખાસ કરીને તવા પર બનાવવામાં આવે છે, જેનાથી મસાલાનો સ્વાદ વધુ નીખરી આવે છે. પાઉં કે બ્રેડ સાથે આ ગરમાગરમ પનીર ગોટાલા ખાવાની મજા જ કંઈક અલગ હોય છે.

• સામગ્રી

પનીરઃ 250 ગ્રામ

શાકભાજીઃ 2 ઝીણી સમારેલી ડુંગળી, 2 ઝીણા સમારેલા ટામેટા, એક ઝીણું સમારેલુ કેપ્સિકમ

મસાલાઃ એક ચમચી લાલ મરચું, અડધી ચમચી હળદર, એક ચમચી ધાણાજીરું, અડધી ચમચી જીરૂં, મીઠું સ્વાદ અનુસાર

અન્યઃ 4-5 કળી લસણ (અથવા લીલું લસણ), 2 મોટી ચમચી માખણ (બટર), છીણેલું ચીઝ, લીલા ધાણા, તેલ અથવા ઘી

• બનાવવાની રીત

સૌ પ્રથમ પનીરને ત્રણ ભાગમાં વહેંચી લો. થોડા નાના ટુકડા (ક્યુબ્સ) કરો, થોડું પનીર છીણી લો અને થોડા ભાગને હાથેથી મસળી (મેશ કરી) લો. છીણેલા પનીરમાં થોડું મીઠું અને લાલ મરચું ભેળવીને બાજુ પર રાખી દો. એક લોખંડના તવા અથવા પહોળા પેનમાં થોડું તેલ ગરમ કરો. ધીમી આંચ પર જીરું, લસણ અને તમામ સૂકા મસાલા ઉમેરી હળવા શેકી લો. ત્યારબાદ તેમાં ડુંગળી, ટામેટા અને કેપ્સિકમ ઉમેરો. શાકભાજીને ધીમી આંચ પર ત્યાં સુધી ચઢવા દો જ્યાં સુધી તેનું પાણી છૂટું ન પડે અને મસાલા સાથે ભળીને એક સરસ ગ્રેવી તૈયાર ન થઈ જાય. હવે તૈયાર થયેલા મિશ્રણને મેશરની મદદથી હળવું મેશ કરો. બીજી તરફ, પનીરના ક્યુબ્સને તવા પર સહેજ ક્રિસ્પી થાય ત્યાં સુધી સાંતળી લો. હવે તૈયાર ગ્રેવીમાં મસળેલું પનીર અને છીણેલું પનીર ઉમેરી બરાબર મિક્સ કરો. અંતમાં સાંતળેલા પનીરના ટુકડા ઉપરથી ઉમેરો. સ્વાદ મુજબ પુષ્કળ માખણ અને છીણેલું ચીઝ નાખી ગેસ બંધ કરી દો. તૈયાર પનીર ગોટાલા પર ઝીણા સમારેલા લીલા ધાણા ભભરાવો. તેને માખણમાં શેકેલા પાઉં અથવા બ્રેડ સાથે ગરમાગરમ સર્વ કરો. આ વાનગીનો સ્વાદ તમને સુરત કે મુંબઈના પ્રખ્યાત સ્ટ્રીટ ફૂડની યાદ અપાવશે.