અમદાવાદ, 5 સપ્ટેમ્બર, 2026 – શિક્ષક દિવસના ઐતિહાસિક પ્રસંગે આજે જીસીસીઆઈમાં બિઝનેસ વુમન કમિટીના નવા ચેરપર્સનની નિયુક્તિ થઈ હતી. ગુજરાત ચેમ્બર ઓફ કોમર્સ એન્ડ ઈન્ડસ્ટ્રી (GCCI) પરિસર આશ્રમ રોડ, અમદાવાદ ખાતે GCCI બિઝનેસ વુમન કમિટી (BWC) નો નેતૃત્વ હસ્તાંતરણ સમારોહ યોજાયો હતો, જેમાં ‘સહાય’ના સહ-સ્થાપક અને ‘ફ્રીડમ’ એનજીઓના ચીફ ટ્રસ્ટ ઓફિસર સુશ્રી જીલ શાહ મુખ્ય અતિથિ તરીકે ઉપસ્થિત રહ્યા હતા.
GCCIના સભ્યોની હાજરીમાં, વિદાય લેતા BWC ચેરપર્સન આશા વઘાસિયાએ, BWC ચેરપર્સન તરીકે કાર્યભાર શાલુ લેખડિયાને સોંપ્યો હતો.
સભાનું સ્વાગત કરતા GCCIના પ્રમુખ શ્રી રાજેશ ગાંધીએ GCCIની પ્રવૃત્તિઓમાં બિઝનેસ વુમન કમિટીના નોંધપાત્ર યોગદાનની પ્રશંસા કરી હતી અને ૨૦૨૫-૨૬ દરમિયાન તેમના અનુકરણીય નેતૃત્વ અને સમર્પિત પ્રયાસો માટે વિદાય લેતા ચેરપર્સન સુશ્રી આશા વઘાસિયાને અભિનંદન પાઠવ્યા હતા. તેમણે સુશ્રી જીલ શાહનું સ્વાગત કર્યું હતું અને તેમની સંસ્થાઓ દ્વારા કરવામાં આવતા માનવતાવાદી કાર્યોની સરાહના કરી હતી.
નવનિયુક્ત BWC ચેરપર્સન સુશ્રી શાલુ લેખડિયાને અભિનંદન આપતા શ્રી ગાંધીએ તેમને સફળતાની શુભેચ્છાઓ પાઠવી હતી અને કમિટીને ઉદ્યોગસાહસિકતા તથા રાષ્ટ્ર-નિર્માણમાં તેનું યોગદાન વધુ મજબૂત કરવા જણાવ્યું હતું. તેમણે સભ્યોને “બ્રાન્ડ GCCI” ને વધુ મજબૂત અને સમૃદ્ધ બનાવવા પણ વિનંતી કરી હતી.
વિદાય લેતા ચેરપર્સન સુશ્રી આશા વઘાસિયાએ તેમના કાર્યકાળ દરમિયાન કમિટી દ્વારા હાથ ધરવામાં આવેલા વર્ષભરના વિવિધ પ્રોજેક્ટ્સ અને પહેલો પર પ્રકાશ પાડ્યો હતો અને GCCIના નેતૃત્વ તથા સભ્યોનો તેમના સહયોગ બદલ આભાર માન્યો હતો.
ચાર્જ સ્વીકારતા નવનિયુક્ત ચેરપર્સન સુશ્રી શાલુ લેખડિયાએ તેમનામાં વિશ્વાસ મૂકવા બદલ GCCI નેતૃત્વનો આભાર માન્યો હતો અને સુશ્રી આશા વઘાસિયાને તેમના સફળ કાર્યકાળ માટે અભિનંદન આપ્યા હતા. તેમણે GCCIના ઉદ્દેશ્યો પ્રત્યે પોતાની પ્રતિબદ્ધતા દર્શાવી હતી, સભ્યોને BWCની પ્રવૃત્તિઓમાં સક્રિયપણે ભાગ લેવા વિનંતી કરી હતી અને મહિલા ઉદ્યોગસાહસિકોને “વિકસિત ભારત @૨૦૪૭” ના વિઝનમાં યોગદાન આપવા જણાવ્યું હતું.
BWCના સહ-અધ્યક્ષ સુશ્રી બંસી શાહે સ્વાગત પ્રવચન દ્વારા ઉપસ્થિત મહાનુભાવોનું અભિવાદન કર્યું, જ્યારે કાર્યક્રમના અનુગામી તબક્કે BWCના સહ-અધ્યક્ષ સુશ્રી નમ્રતા શાહે મુખ્ય અતિથિનો ઔપચારિક પરિચય કરાવ્યો.
મુખ્ય અતિથિ સુશ્રી જીલ શાહે GCCI બિઝનેસ વુમન કમિટીના કામગીરીની પ્રશંસા કરી હતી અને ભારપૂર્વક જણાવ્યું હતું કે કમિટીની પહેલો સમાજના વધુ સારા ભલા માટે હોવી જોઈએ અને સકારાત્મક તથા અર્થપૂર્ણ પ્રભાવ ઊભો કરવો જોઈએ. આ સમારોહનું સમાપન BWCના સભ્ય સુશ્રી માનસી પટેલ દ્વારા આભારવિધિ સાથે થયું હતું.
