નવી દિલ્હી, 22 એપ્રિલ 2026: ભારતની ઉર્જા જરૂરિયાતોને પહોંચી વળવા અને દેશને સ્વચ્છ ઇંધણ તરફ લઈ જવાના અભિયાનમાં એક મોટી સફળતા મળી છે. ભારતની અગ્રણી ગેસ કંપની GAIL (ઇન્ડિયા) લિમિટેડે અમેરિકાના સબાઈન પાસ ટર્મિનલ પરથી ‘એનર્જી ફિડેલિટી’ (Energy Fidelity) નામના વિશાળ LNG (લિક્વિડ નેચરલ ગેસ) જહાજને લીલી ઝંડી આપી રવાના કર્યું છે. આ ઘટના ભારત અને અમેરિકા વચ્ચે વધતી જતી વ્યૂહાત્મક ઉર્જા ભાગીદારીનું પ્રતીક છે.
હ્યુસ્ટન ખાતેના ભારતના કોન્સ્યુલ જનરલ ડી.સી. મંજૂનાથ દ્વારા ૨૦ એપ્રિલના રોજ આ અત્યાધુનિક જહાજને ફ્લેગ-ઓફ કરવામાં આવ્યું હતું. ૧,૭૪,૦૦૦ ક્યુબિક મીટરની ક્ષમતા ધરાવતું આ જહાજ ભારતના લાંબા ગાળાના LNG શિપિંગ પોર્ટફોલિયોનો એક ભાગ છે. GAIL ના જણાવ્યા અનુસાર, આ પગલું ભારતની ઉર્જા લોજિસ્ટિક્સને મજબૂત બનાવશે અને દેશના વિકાસ માટે સ્વચ્છ ઇંધણનો અવિરત પુરવઠો સુનિશ્ચિત કરશે.
હ્યુસ્ટન સ્થિત ભારતીય દૂતાવાસે જણાવ્યું હતું કે, આ પ્રસંગ ભારત અને અમેરિકા વચ્ચેના પરસ્પર વિશ્વાસ અને ઉર્જા સુરક્ષાના સમાન લક્ષ્યોને પ્રતિબિંબિત કરે છે. ભારત હવે ઝડપથી કોલસા અને અન્ય પ્રદૂષણ ફેલાવતા ઇંધણથી ખસીને નેચરલ ગેસ તરફ વળી રહ્યું છે, જેમાં અમેરિકા એક ભરોસાપાત્ર ભાગીદાર તરીકે ઉભરી આવ્યું છે. આ સહયોગ સરકારના ‘3Ts’ (Trade, Technology, and Tourism) ના વિઝનને પણ વેગ આપે છે.
‘એનર્જી ફિડેલિટી’ માત્ર એક જહાજ નથી, પરંતુ ભારતની ભવિષ્ય માટેની સજ્જતાનું પ્રમાણ છે. આનાથી ભારતની સપ્લાય ચેઈન વધુ લવચીક બનશે અને આંતરરાષ્ટ્રીય બજારમાં ઉર્જાના વધતા ભાવો વચ્ચે ભારતને સ્થિરતા પ્રદાન કરશે.
વધુ વાંચો: ચૂંટણી પંચે IEVPનો બીજો તબક્કો શરૂ કર્યો, મુખ્ય ચૂંટણી કમિશનર જ્ઞાનેશ કુમારે ઉદ્ઘાટન કર્યું
