બજાર જેવો ચટપટો પેરી પેરી મસાલો હવે ઘરે આ રીતે બનાવો

આજકાલ લારી-ગલ્લાથી લઈને મોટી હોટલોમાં ‘પેરી પેરી’ ફ્લેવરની ખૂબ જ બોલબાલા છે. ખાસ કરીને સ્નેક્સ, ફ્રેન્ચ ફ્રાઈસ, પોપકોર્ન, સેન્ડવીચ અને પાસ્તા જેવી વાનગીઓમાં આ મસાલો સ્વાદમાં ચાર ચાંદ લગાવી દે છે. બજારમાં પેરી પેરી મસાલો આસાનીથી મળી જાય છે, પરંતુ તેમાં આર્ટિફિશિયલ ફ્લેવર અને પ્રિઝર્વેટિવ્સ ભેળવેલા હોય છે જે સ્વાસ્થ્ય માટે હાનિકારક હોઈ શકે છે. જો તમે પણ તમારા રોજિંદા નાસ્તામાં થોડો ટ્વિસ્ટ લાવવા માંગો છો, તો શુદ્ધ અને હાઈજેનિક પેરી પેરી મસાલો ઘરે બનાવવો એ શ્રેષ્ઠ વિકલ્પ છે. આ મસાલો બનાવીને તમે લાંબા સમય સુધી સ્ટોર પણ કરી શકો છો. ચાલો જાણીએ આ મસાલો બનાવવાની સ્ટેપ-બાય-સ્ટેપ રીત.

• જરૂરી સામગ્રી

2 ટેબલસ્પૂન – લાલ મરચું પાવડર

1 ટીસ્પૂન – કાશ્મીરી લાલ મરચું (સરસ રંગ માટે)

1 ટીસ્પૂન – લસણનો પાવડર

1 ટીસ્પૂન – આદુનો પાવડર

1 ટીસ્પૂન – મરી પાવડર

1 ટીસ્પૂન – ઓરિગેનો

1 ટીસ્પૂન – સૂકી તુલસી

1 ટીસ્પૂન – આમચૂર પાવડર

1/2 ટીસ્પૂન – સાઇટ્રિક એસિડ (લીંબુના ફૂલ)

1 ટીસ્પૂન – મીઠું (સ્વાદ મુજબ)

1/2 ટીસ્પૂન – દળેલી ખાંડ

• બનાવવાની રીત

સૌથી પહેલા એકદમ સાફ અને કોરો બાઉલ લો. તેમાં લાલ મરચું પાવડર અને કાશ્મીરી મરચું ઉમેરો. ત્યારબાદ તેમાં લસણનો પાવડર, આદુનો પાવડર અને મરી પાવડર મિક્સ કરો. હવે તેમાં ઓરિગેનો અને સૂકી તુલસી ઉમેરો, જેનાથી મસાલામાં હળવો ઈટાલિયન ફ્લેવર આવશે. ખટાશ માટે તેમાં આમચૂર પાવડર અને સાઇટ્રિક એસિડ ઉમેરો. છેલ્લે મીઠું અને ખાંડ નાખીને બધી જ સામગ્રીને બરાબર મિક્સ કરી લો. તૈયાર થયેલા આ મસાલાને એક એરટાઈટ કન્ટેનરમાં ભરીને સૂકી જગ્યાએ રાખો. તૈયાર છે તમારો ચટપટો પેરી પેરી મસાલો!

• કેવી રીતે કરશો ઉપયોગ?

ફ્રેન્ચ ફ્રાઈસ, પોપકોર્ન કે મેગી પર ઉપરથી ભભરાવો. સેન્ડવીચ, પાસ્તા કે પિઝામાં મિક્સ કરો. ગ્રીલ્ડ પનીર કે વેજીટેબલ્સના મેરીનેશન માટે ઉપયોગ કરો. જો તમે રોજિંદા શાક કે પરાઠાને નવો સ્વાદ આપવા માંગતા હોવ, તો પણ આ મસાલો વાપરી શકાય છે.