વોશિંગ્ટન, 06 સપ્ટેમ્બર 2026: કેલિફોર્નિયાના ફ્રેસ્નોમાં આવેલા સીએરા સ્કાય પાર્ક એરપોર્ટ નજીક એક નાનું વિમાન દુર્ઘટનાગ્રસ્ત થતાં બે લોકોનાં મોત થયાં છે અને અન્ય બેની હાલત ગંભીર છે.
આ વિમાન વાયવ્ય ફ્રેસ્નોમાં આવેલા સિયેરા સ્કાય પાર્ક એરપોર્ટ નજીક, બ્લાઈથ એવન્યુ પાસે દુર્ઘટનાગ્રસ્ત થયું હતું. ફ્રેસ્નો ફાયર વિભાગે પુષ્ટિ કરી છે કે દુર્ઘટનાસ્થળે બે વ્યક્તિઓના મોત થયા છે, જ્યારે અન્ય બે વ્યક્તિઓ ગંભીર હાલતમાં બચી ગઈ હતી અને તેમને તાત્કાલિક સ્થાનિક હોસ્પિટલમાં ખસેડવામાં આવી હતી.
અકસ્માત સ્થળે અનેક એજન્સીઓએ મોટા પાયે રાહત કામગીરી શરૂ કરી. ઘટનાસ્થળને સુરક્ષિત કરવા અને પીડિતોને મદદ કરવા માટે ફ્રેસ્નો પોલીસ વિભાગ, ફ્રેસ્નો ફાયર વિભાગ, ફ્રેસ્નો કાઉન્ટી શેરિફની ઓફિસ અને નોર્થ સેન્ટ્રલ ફાયર વિભાગની કટોકટીની ટીમો ત્યાં પહોંચી હતી.
સ્થાનિક રહેવાસીઓ માટે વીજ પુરવઠો થોડા સમય માટે ખોરવાઈ ગયો
આ અકસ્માતની અસર સ્થાનિક માળખાગત સુવિધાઓ પર પણ પડી હતી. આસપાસના વિસ્તારમાં વીજ પુરવઠો ખોરવાઈ ગયો હતો, જેને પગલે ‘પેસિફિક ગેસ એન્ડ ઇલેક્ટ્રિક કંપની’ની ટીમોને ઘટનાસ્થળે મોકલવામાં આવી હતી.
PG&Eના પાવર કટ (વીજળી ગુલ થયાના) નકશા મુજબ, નજીકના રહેવાસીઓનો વીજ પુરવઠો થોડા સમય માટે બંધ થઈ ગયો હતો, પરંતુ બાદમાં તે સંપૂર્ણપણે પુનઃસ્થાપિત કરવામાં આવ્યો હતો.
સત્તાવાળાઓએ હજુ સુધી પીડિતોની ઓળખ જાહેર કરી નથી કે વિમાનના મોડેલ અંગેની વિગતો પણ આપી નથી. દુર્ઘટનાનું કારણ હજુ સ્પષ્ટ થયું નથી. આ અકસ્માતની તપાસ સઘન રીતે ચાલી રહી છે અને અધિકારીઓ વિમાનના કાટમાળ તથા સંભવિત સાક્ષીઓ પાસેથી માહિતી એકત્ર કરી રહ્યા છે.
વધુ વાંચો: ઈરાનમાં હાઈવે પર ટક્કર બાદ ઓઈલ ટેન્કરમાં ભયાનક વિસ્ફોટ, 10 લોકોના મોત
