જયપુરઃ રાજસ્થાનના જેસલમેરથી એક પાકિસ્તાની જાસૂસની ધરપકડના સમાચાર સામે આવ્યા છે. સુરક્ષા એજન્સીઓએ એક મહિના પહેલા શંકાસ્પદ જાસૂસની ધરપકડ કરી હતી, પરંતુ પૂછપરછ દરમિયાન નવા ખુલાસા સામે આવી રહ્યા છે. આરોપી પઠાણ ખાન નામનો વ્યક્તિ છે, જે જેસલમેર જિલ્લાના મોહનગઢ નહેર વિસ્તારનો રહેવાસી છે. એડીજી ઇન્ટેલિજન્સ સંજય અગ્રવાલે પુષ્ટિ આપી છે કે આરોપી પઠાણ ખાન લાંબા સમયથી પાકિસ્તાનની ગુપ્તચર એજન્સી ISIના હેન્ડલર તરીકે કામ કરી રહ્યો હતો અને ભારત-પાકિસ્તાન સરહદને અડીને આવેલા વિસ્તારોની સંવેદનશીલ માહિતી શેર કરી રહ્યો હતો.
પઠાણ ખાનની જેસલમેર જિલ્લાના ઝીરો આરડી મોહનગઢ વિસ્તારમાંથી ધરપકડ કરવામાં આવી છે. લગભગ એક મહિના પહેલા શંકાના આધારે તેની ધરપકડ પણ કરવામાં આવી હતી, પરંતુ આ વખતે જ્યારે તપાસ એજન્સીઓએ તેની ઊંડાણપૂર્વક પૂછપરછ કરી, ત્યારે ઘણા ચોંકાવનારા ખુલાસા થયા. જયપુરમાં તેની સામે ઓફિશિયલ સિક્રેટ્સ એક્ટ હેઠળ કેસ નોંધવામાં આવ્યો છે.
તપાસમાં જાણવા મળ્યું છે કે, પઠાણ ખાન સરહદી વિસ્તારોમાં સેનાની ગતિવિધિઓ પર નજર રાખતો હતો અને સતત વીડિયો અને ફોટોગ્રાફ્સ પાકિસ્તાનને મોકલતો હતો. આ વ્યૂહાત્મક માહિતીના બદલામાં તેને પાકિસ્તાન પાસેથી પૈસા મળતા હતા. પાકિસ્તાનમાં ISI હેન્ડલર્સ સાથે ફોન અને ઇન્ટરનેટ ચેટ દ્વારા તેના સતત સંપર્કના પુરાવા મળ્યા છે. સૂત્રોના જણાવ્યા અનુસાર, પઠાણ ખાન વર્ષ 2019 માં પાકિસ્તાન ગયો હતો અને ત્યાં તે પાકિસ્તાનમાં રહેતા તેના સંબંધીઓને મળ્યો હતો. એવી શંકા છે કે તે સમયગાળા દરમિયાન તે ISIના સંપર્કમાં આવ્યો હતો અને ભારત પરત ફર્યા પછી, તેણે જાસૂસી નેટવર્ક સક્રિય કર્યું હતું.