તેલ અવીવ, 16 ઓક્ટોબર 2026: ઇઝરાયેલની સેના (આઈડીએફ) એ હમાસના પૂર્વ વડા યાહ્યા સિનવારના 10 વર્ષના પુત્ર ઇબ્રાહિમ દ્વારા લખાયેલી એક ચિઠ્ઠી જાહેર કરી છે. સેનાના જણાવ્યા અનુસાર, આ પત્ર યુદ્ધની શરૂઆતમાં લખવામાં આવ્યો હતો, જે 2024 માં ગાઝા પટ્ટીમાં ચાલી રહેલા સૈન્ય અભિયાન દરમિયાન ઇઝરાયેલી સૈનિકોને મળ્યો હતો. સિનવારના મોતને બે વર્ષ પૂર્ણ થવાના પ્રસંગે ઇઝરાયેલ દ્વારા આ ચિઠ્ઠી અને તેની સાથેના કેટલાક ચિત્રો મીડિયા સમક્ષ રજૂ કરવામાં આવ્યા છે.
આ પત્રમાં બાળકે પિતા પ્રત્યેનો પ્રેમ વ્યક્ત કરવાની સાથે હિંસક મનોવૃત્તિ પણ દર્શાવી છે. ઇબ્રાહિમે લખ્યું છે કે તે પોતાના પિતાને ખૂબ યાદ કરે છે અને ઇચ્છે છે કે તેઓ પાછા આવીને તેને ભેટી પડે. આ સાથે જ તેણે કલાશ્નિકોવ રાઇફલથી યહૂદીઓને ગોળી મારવાની ઇચ્છા પણ વ્યક્ત કરી છે. ઇઝરાયેલી સેના દ્વારા આપવામાં આવેલા અનુવાદ મુજબ, બાળકે લખ્યું છે કે તે સતત કાગળ અને પૂંઠામાંથી પિસ્તોલ, ટેન્ક અને કલાશ્નિકોવ જેવી એસોલ્ટ રાઇફલો બનાવી રહ્યો છે.
ચિઠ્ઠીના અંતમાં બાળકે પિતાને પૂછ્યું છે કે તેઓ ક્યારે પાછા ફરશે અને તેને પોતાની બાહોમાં લઈને ઊંઘાડશે. આ સાથે તેણે યુદ્ધ પૂરું થાય અને પિતા સુરક્ષિત રહે તે માટે દુઆ પણ માગી છે. ઇઝરાયેલી સેનાએ આ ચિઠ્ઠીની સાથે બાળકે દોરેલા કેટલાક ચિત્રો પણ જાહેર કર્યા છે, જેમાં હથિયારો, ગાઝા-ઇઝરાયેલ બોર્ડર પરની ફેન્સિંગ પાસે ઉભેલી ટેન્ક અને ઇઝરાયેલ તરફ જતી મિસાઈલોઓ દર્શાવવામાં આવી છે.
આઈડીએફનું કહેવું છે કે આ દસ્તાવેજો દર્શાવે છે કે હમાસની કટ્ટરપંથી વિચારધારાની બાળકોના માનસિક માનસ પર કેટલી ઊંડી અને વિપરીત અસર પડી રહી છે. ઉલ્લેખનીય છે કે યાહ્યા સિનવાર ગાઝામાં હમાસનો વડો હતો અને 7 ઓક્ટોબર 2023 ના રોજ ઇઝરાયેલ પર થયેલા ભયાનક હુમલાનો મુખ્ય માસ્ટરમાઇન્ડ હતો. ઓક્ટોબર 2024 માં ઇઝરાયેલી સેનાએ તેને ઠાર માર્યો હતો. આ ચિઠ્ઠી સામે આવ્યા બાદ હમાસની વિચારધારા અને બાળકો પર તેની અસર અંગે વૈશ્વિક સ્તરે ફરી ચર્ચા જાગી છે.
