વોશિંગ્ટન, 16 ઓક્ટોબર 2026: ટેક્નોલોજીના ક્ષેત્રમાં વિશ્વ ઝડપથી પ્રગતિ કરી રહ્યું છે. આ જોતાં, નજીકના ભવિષ્યમાં આકાશમાં ઉડતી કાર જોવા મળે તો તેમાં નવાઈ પામવા જેવું કંઈ નથી. હકીકતમાં, ટેસ્લાએ હવે ઉડતી કારનું એક પ્રોટોટાઇપ (નમૂનો) વિશ્વ સમક્ષ રજૂ કર્યું છે.
ટેસ્લાએ ‘ઉડતી કાર’ના ખ્યાલને વાસ્તવિકતાની એક ડગલું વધુ નજીક લાવી દીધો છે, જોકે તેના સામાન્ય ઉપયોગમાં આવતા હજુ ઘણો સમય લાગી શકે છે.
એલોન મસ્કની ઉડતી કાર
15 ઓક્ટોબરે ટેક્સાસના મેકગ્રેગોરમાં એક કાર્યક્રમ યોજાયો હતો. આ કાર્યક્રમ દરમિયાન, ટેસ્લાએ તેની નવી ડિઝાઈન કરેલી ‘રોડસ્ટર’ (Roadster) કાર રજૂ કરી. એક તબક્કે, આ કાર એક ખાસ રેમ્પ પર ઊંધી દોડી; હવામાં ગોળ ફરતા કરતબો (સ્ટંટ્સ) કર્યા અને ત્યારબાદ સુરક્ષિત રીતે નીચે ઉતરી.
આ સ્ટંટમાં એલોન મસ્કની રોકેટ કંપની, ‘સ્પેસએક્સ’ (SpaceX) સાથે મળીને વિકસાવવામાં આવેલી ટેક્નોલોજી દર્શાવવામાં આવી છે. એલોન મસ્કે સોશિયલ મીડિયા પ્લેટફોર્મ ‘X’ પર રોડસ્ટરનો એક વીડિયો પણ શેર કર્યો છે.
X પર એક વીડિયો શેર કરતા મસ્કે લખ્યું, “એવું લાગે છે કે ભવિષ્યમાં ખરેખર ઉડતી કાર હશે.” નવી ડિઝાઈન ધરાવતી આ રોડસ્ટર (Roadster) કાર SpaceX દ્વારા નિર્મિત ‘કોલ્ડ-ગેસ થ્રસ્ટર્સ’થી સજ્જ છે, જે થ્રસ્ટ (ધક્કો) ઉત્પન્ન કરવા માટે દબાણયુક્ત ગેસનો ઉપયોગ કરે છે.
2017માં એક ઉડતી કાર જોવા મળી હતી
ટેસ્લાએ નવેમ્બર 2017માં તેની આગામી પેઢીની ‘રોડસ્ટર’ (Roadster) વિશે સૌપ્રથમ જાહેરાત કરી હતી. જોકે તેનું ઉત્પાદન ઘણું વહેલું શરૂ થવાની અપેક્ષા હતી, પરંતુ આ પ્રોજેક્ટમાં વારંવાર વિલંબ થયો જેના કારણે ગ્રાહકોએ આ ઇલેક્ટ્રિક સ્પોર્ટ્સ કાર માટે વર્ષો સુધી રાહ જોવી પડી.
SpaceX ઇવેન્ટમાં પ્રદર્શિત કરવામાં આવેલી ઉડતી કાર અત્યંત નિયંત્રિત પરિસ્થિતિઓમાં કાર્યરત જોવા મળી હતી. જોકે, હાલમાં એવા કોઈ સંકેત નથી કે ‘રોડસ્ટર’ (Roadster) ને જાહેર સ્થળોએ ઉડવાની પરવાનગી આપવામાં આવી હોય.
વધુ વાંચો: ‘બાંગ્લાદેશની જેમ સત્તા પરિવર્તનનો પ્રયાસ’, રાજનાથ સિંહના વિપક્ષ પર પ્રહાર
