ચારધામની મુલાકાતે આવનાર શ્રદ્ધાળુઓની સંખ્યા પાંચ લાખને પાર,સૌથી વધુ 1.75 લાખ ભક્તોએ કેદારનાથ ધામની લીધી મુલાકાત
દહેરાદુન:ચાર ધામ યાત્રાએ અત્યાર સુધીમાં દર્શન કરનાર શ્રદ્ધાળુઓની સંખ્યા પાંચ લાખને પાર કરી ગઈ છે. સૌથી વધુ 1.75 લાખ ભક્તોએ કેદારનાથ ધામની મુલાકાત લીધી છે. પર્યટન વિભાગ દ્વારા જાહેર કરવામાં આવેલા રિપોર્ટ અનુસાર, 22 એપ્રિલથી 7 મે સુધી 505286 લાખથી વધુ શ્રદ્ધાળુઓએ કેદારનાથ, બદ્રીનાથ, ગંગોત્રી અને યમુનોત્રી ધામની મુલાકાત લીધી છે. જેમાં કેદારનાથ ધામમાં 1.75 લાખ, બદ્રીનાથમાં 1,18,116, ગંગોત્રીમાં 1.13 લાખ, યમુનોત્રી મંદિરમાં એક લાખ શ્રદ્ધાળુઓએ દર્શન કર્યા છે.
ચારધામ યાત્રામાં આવતા અનેક શ્રદ્ધાળુઓ સ્વાસ્થ્ય સંબંધિત સમસ્યાઓને અવગણીને જોખમ ઉઠાવી રહ્યા છે. આરોગ્ય વિભાગ દ્વારા મુસાફરી માર્ગો પર કરવામાં આવી રહેલા સ્ક્રીનીંગમાં હાઈ બ્લડ પ્રેશર, અસ્થમા સહિતના શ્વાસના રોગો સામે આવી રહ્યા છે. કેદારનાથ અને યમુનોત્રી ધામમાં 33 મુસાફરોને મુસાફરી ન કરવાની સલાહ આપવામાં આવી છે. યાત્રાના રૂટ પર અત્યાર સુધીમાં 55 વર્ષથી ઉપરના 40 હજારથી વધુ મુસાફરોની તપાસ કરવામાં આવી છે.
આરોગ્ય વિભાગ કેદારનાથ, બદ્રીનાથ, ગંગોત્રી અને યમુનોત્રી ધામની મુલાકાતે જતા યાત્રાળુઓના સ્વાસ્થ્યની તપાસ કરી રહ્યું છે. ચારધામ ઊંચા હિમાલયના પ્રદેશોમાં હોવાને કારણે શ્રદ્ધાળુઓને સ્વાસ્થ્ય સંબંધિત સમસ્યાઓનો સામનો કરવો પડે છે.
જે ભક્તો પહેલાથી જ કોઈ રોગથી પીડિત છે, તેમના માટે જોખમ વધુ છે. આ વખતે આરોગ્ય વિભાગે યાત્રાના રૂટ પર 22 મેડિકલ કેર પોઈન્ટ ઉભા કર્યા છે. જ્યાં ભક્તોની સ્ક્રીનિંગ કરવામાં આવી રહી છે. કેદારનાથ અને યમુનોત્રી ધામની મુલાકાત લેવા માટે, 1325 યાત્રાળુઓએ સ્વાસ્થ્ય સંબંધિત સમસ્યાઓ હોવા છતાં મુસાફરી કરવાની જવાબદારી લીધી છે.
પ્રવાસન વિભાગના રેકોર્ડ મુજબ, 22 એપ્રિલથી 6 મે દરમિયાન ચારધામ યાત્રા દરમિયાન 55 વર્ષથી વધુ વયના 40,000 થી વધુ યાત્રાળુઓ અને 54 વર્ષથી ઓછી ઉંમરના 42,000 યાત્રાળુઓની તપાસ કરવામાં આવી હતી.
