દિલ્હી: આકાશને આંબી રહેલા ભાવોને નીચે લાવવા માટે નેપાળ ભારતમાં જથ્થાબંધ ટામેટાંની નિકાસ કરવા તૈયાર છે, પરંતુ તેણે બજારની સરળ પહોંચ અને અન્ય જરૂરી સુવિધાઓની માંગ કરી છે. નાણાપ્રધાન નિર્મલા સીતારમણે સંસદમાં જણાવ્યું હતું કે દેશમાં ભાવમાં વિક્રમી વૃદ્ધિ વચ્ચે ભારતે નેપાળમાંથી ટામેટાંની આયાત કરવાનું શરૂ કર્યું છે તે પછી પાડોશી દેશ તરફથી આ ખાતરી મળી છે.
ભારે વરસાદને કારણે રૂ. 242 પ્રતિ કિલોના ઊંચા છૂટક ભાવને કારણે ભારત પ્રથમ વખત ટામેટાંની આયાત કરી રહ્યું છે. કૃષિ મંત્રાલયના પ્રવક્તા શબનમ શિવકોટીએ શુક્રવારે કહ્યું હતું કે નેપાળ લાંબા ગાળાના ધોરણે ભારતમાં ટામેટાં જેવી શાકભાજીની નિકાસ કરવા આતુર છે, પરંતુ આ માટે ભારતે તેના બજાર અને અન્ય જરૂરી સુવિધાઓ સુધી સરળ પહોંચ પ્રદાન કરવી પડશે. તેમણે કહ્યું કે, નેપાળે એક સપ્તાહ પહેલા જ સત્તાવાર માધ્યમો દ્વારા ભારતમાં ટામેટાંની નિકાસ શરૂ કરી દીધી છે, પરંતુ તે મોટી માત્રામાં નથી.
નેપાળી ટામેટાં માટે ભારત સારું બજાર
તેમણે કહ્યું કે ટામેટાંની મોટા પાયે નિકાસ માટેની વ્યવસ્થા કરવાની બાકી છે. કાળીમાટી ફળો અને શાકભાજી બજાર વિકાસ બોર્ડના ડેપ્યુટી ડાયરેક્ટર બિનયા શ્રેષ્ઠાએ જણાવ્યું હતું કે, “જો અમને ભારતીય બજારમાં સરળતાથી પ્રવેશ આપવામાં આવે તો નેપાળ ભારતમાં મોટી માત્રામાં ટામેટાંની નિકાસ કરી શકે છે.” તેમણે કહ્યું,”ભારત નેપાળી ટામેટાં માટે સારું બજાર છે,”
તેમણે જણાવ્યું હતું કે, કાઠમાંડુ ખીણના ત્રણ જિલ્લા – કાઠમાંડુ, લલિતપુર અને ભક્તપુર -માં ટામેટાં પુષ્કળ પ્રમાણમાં ઉગાડવામાં આવે છે અને તે સ્થાનિક માંગને પહોંચી વળવા માટે પર્યાપ્ત કરતાં વધુ છે. શ્રેષ્ઠાએ સ્વીકાર્યું કે કાઠમાંડુમાં ઉગાડવામાં આવતા કેટલાક ટામેટાં ભારતીય બજારમાં અનૌપચારિક માધ્યમો દ્વારા નિકાસ કરવામાં આવે છે.
