વાળની સુંદરતા માટે વરદાન છે આ હર્બલ શેમ્પૂ: ઘરે જ બનાવો કુદરતી શેમ્પૂ
આજના પ્રદૂષણ અને કેમિકલયુક્ત પ્રોડક્ટ્સના જમાનામાં વાળની સમસ્યા સામાન્ય બની ગઈ છે. બજારમાં મળતા મોંઘા અને કેમિકલયુક્ત શેમ્પૂ લાંબે ગાળે વાળને નુકસાન પહોંચાડે છે. જો તમે વાળને મૂળમાંથી મજબૂત, મુલાયમ અને ચમકદાર બનાવવા માંગતા હોવ, તો ઘરે બનાવેલું હર્બલ શેમ્પૂ સૌથી સુરક્ષિત અને શ્રેષ્ઠ વિકલ્પ છે. આયુર્વેદિક જડીબુટ્ટીઓથી તૈયાર આ શેમ્પૂ ખોડો (ડેન્ડ્રફ) અને વાળ ખરવાની સમસ્યામાં રામબાણ ઈલાજ સાબિત થાય છે.
- સામગ્રી
અરીઠા: 8-10 નંગ
શિકાકાઈ: 4-5 ટુકડા
સૂકા આમળા: 4-5 નંગ
મેથી દાણા: 1 ચમચી
પાણી: 2 થી 3 કપ
- બનાવવાની સરળ રીત
સૌથી પહેલા અરીઠા, શિકાકાઈ અને આમળાને રાત્રે પાણીમાં પલાળી રાખો. બીજા દિવસે સવારે તે જ પાણીમાં આ તમામ વસ્તુઓને 10-15 મિનિટ સુધી મધ્યમ આંચ પર ઉકાળો. જ્યારે પાણી ઉકળીને અડધું રહી જાય ત્યારે ગેસ બંધ કરી દો અને તેને ઠંડુ થવા દો. મિશ્રણ ઠંડુ થયા પછી તેને હાથથી બરાબર મસળી લો જેથી જડીબુટ્ટીઓનો અર્ક પાણીમાં ભળી જાય. ત્યારબાદ આ પાણીને ગાળી લો. હવે તેમાં અગાઉથી પલાળીને રાખેલા મેથી દાણાની પેસ્ટ ઉમેરીને બરાબર મિક્સ કરો. તમારું શુદ્ધ હર્બલ શેમ્પૂ તૈયાર છે!
- ઉપયોગ કરવાની રીત
સૌ પ્રથમ વાળને ભીના કરો અને આ શેમ્પૂને સ્કાલ્પ (માથાની ત્વચા) પર લગાવો. હળવા હાથે 2-3 મિનિટ સુધી મસાજ કરો અને ત્યારબાદ સ્વચ્છ પાણીથી વાળ ધોઈ લો.
- હર્બલ શેમ્પૂના અગણિત ફાયદા
હર્બલ શેમ્પૂ વાળને કોઈ પણ નુકસાન વગર કુદરતી રીતે સાફ કરે છે. આ મિશ્રણ વાળના મૂળને પોષણ આપે છે, જેથી વાળ ખરવાનું પ્રમાણ ઘટે છે. મેથી અને શિકાકાઈ સ્કાલ્પને ઈન્ફેક્શનથી બચાવે છે અને ખોડો દૂર કરે છે. નિયમિત ઉપયોગથી વાળ રેશમ જેવા મુલાયમ અને ચમકદાર બને છે.
કોઈપણ ઉંમરની વ્યક્તિ આ હર્બલ શેમ્પૂનો ઉપયોગ કરી શકે છે. તેના નિયમિત ઉપયોગથી વાળ લાંબા, ઘટાદાર અને સ્વસ્થ બને છે.
