અમદાવાદમાં એક કરોડની કિંમતનું MD ડ્રગ્સ પકડાયું, પેડલર સહિત ત્રણની ક્રાઈમ બ્રાન્ચે કરી ધરપકડ
અમદાવાદઃ શહેરનું યુવાધન પણ ડ્રગ્સના રવાડે ચડી રહ્યું છે. ત્યારે શહેર પોલીસ કમિશનરે પણ ડ્રગ્સ હેરાફેરી સામે બાજ નજર રાખીને ડ્રગ્સ માફિયાઓને દબોચી લેવા સુચના આપતા શહેર ક્રાઈમ બ્રાન્ચ એલર્ટ બની હતી. અને શહેરના નારોલ અને એસજી હાઈવે પરથી ક્રાઈમ બ્રાંચે ડ્રગ્સનો જથ્થો ઝડપી પાડ્યો છે. બે દિવસમાં 1.20 કરોડથી વધુ રકમનો એમડી ડ્રગ્સનો જથ્થો જપ્ત કરવામાં આવ્યો છે. આ ઉપરાંત એક મહિનામાં ક્રાઈમ બ્રાન્ચે 9 NDPSના કેસ કરીને 2 કરોડથી વધુનો મુદ્દામાલ કબ્જે કર્યો છે. એક ડ્રગ્સ પેડલર ઓર્ડર મુજબ રાજસ્થાનથી ડ્રગ્સનો જથ્થો લઈને આવતો અને બીજો દર ત્રણ દિવસે પાલનપુરથી રિક્ષામાં ડ્રગ્સનો જથ્થો લાવતો હતો. આમ પોલીસે ડ્રગ્સ હેરાફેરીના રેકેટનો પડદાફાશ કર્યો છે.
સૂત્રોના જણાવ્યા મુજબ અમદાવાદ શહેર ક્રાઈમ બ્રાન્ચે નારોલ બ્રિજ પાસે આવેલી શિમલા હોટેલમાંથી તૌફિક ઉર્ફે ટાઈગર ઘાંચીને 521.800 ગ્રામ ડ્રગ્સના જથ્થા સાથે પકડી પાડ્યો હતો. ટાઈગર ઘણા સમયથી ઉદયપુરથી આરિફ પઠાણ નામના વ્યક્તિ પાસેથી ડ્રગ્સ મગાવી અમદાવાદના જુદા જુદા વિસ્તારોમાં સપ્લાય કરતો હતો. આ કેસનો આરોપી આરીફ શહેરના તૌફિક તથા અન્ય ડ્રગ્સ ડિલરો પાસેથી જ્યારે પણ ડ્રગ્સનો ઓર્ડર મળે ત્યારે તેના ડ્રગ્સ પેડલર સુહેલ અસરફ મંસુરીને ડ્રગ્સનો જથ્થો લઈને અમદાવાદ મોકલી આપતો હતો. આરીફ અમદાવાદ આવીને હોટેલમાં ચાર-પાંચ દિવસ રોકાતો હતો.
ક્રાઈમ બ્રાન્ચના સૂત્રોએ જણાવ્યું હતું કે, આરોપી આરિફે એવી કબુલાત કરી હતી. કે, તે અલગ અલગ ડ્રગ્સ ડિલરોને ડ્રગ્સ આપતો હતો. આ ડ્રગ્સના પૈસા તે ઓનલાઈન અથવા તો મની ટ્રાન્સફરથી મેળવતો હતો. આરોપી તૌફિક, ઇમરાનખાન પઠાણ, ઝહીર વોરા દ્વારા ડ્રગ્સના ઓર્ડર આપાયા બાદ આરોપી આરીફે રાજસ્થાન ઉદેયપુરથી એક કિલો મેફેડ્રોન ડ્રગ્સનો જથ્થો લઈ સુહેલઅસરફ મંસુરીને મોકલી આપ્યો હતો. સુહેલઅસરફ મંસુરી ઉદેયપુરથી પાંચ દિવસ પહેલા અમદાવાદ આવી નારોલ બ્રિજ પાસે આવેલ હોટલ શિમલા ખાતે રોકાયો હતો. જ્યા આરોપી સુહેલઅસરફ મંસુરીએ તેની પાસેના એક કિલો મેફેડ્રોના જથ્થામાંથી ઇમરાનખાન પઠાણ, ઝહીર વોરા, તૌફિકને ડ્રગ્સનો જથ્થો આપ્યો હતો. દરમિયાન સુહેલઅસરફ મંસુરી પાસેથી તૌફિક ફરીથી ડ્રગ્સનો જથ્થો લેવા આવતા પકડાઈ ગયો હતો. તેની પાસેથી 52.18 લાખનું ડ્રગ્સ કબ્જે કરાયું હતું. આરોપી તૌફિક અગાઉ મારામારીના ગુનામાં પણ પકડાયો હતો. અન્ય વિગતો રિમાન્ડ દરમિયાન તપાસમાં બહાર આવશે.
