દિલ્હી: ઈઝરાયેલ ગાઝા પટ્ટીમાં સતત ખતરનાક હુમલાઓ કરી રહ્યું છે. પહેલા હવાઈ હુમલાઓ અને બાદમાં જમીની હુમલાઓએ ગાઝાને ખંડેર બનાવી દીધું. આ યુદ્ધમાં અત્યાર સુધીમાં 18 હજારથી વધુ લોકો માર્યા ગયા છે. ગાઝાના નિર્દોષ નાગરિકો દરરોજ પોતાનો જીવ ગુમાવી રહ્યા છે. હમાસ દ્વારા બાંધવામાં આવેલી સુરંગો અને અન્ય છુપાયેલા સ્થળો એવા સ્થળોએ હોવા જોઈએ જ્યાં નાગરિકોની ગીચ વસ્તી હોય અથવા હોસ્પિટલ જેવી ઇમારતો હોય. આવી સ્થિતિમાં ઇઝરાયેલ માટે હમાસના ટાર્ગેટને નિશાન બનાવવું ઘણું મુશ્કેલ છે.આ કારણે ગાઝામાં મહિલાઓ અને બાળકો સહિત મોટી સંખ્યામાં નાગરિકોના મોત થયા હતા. નિર્દોષ નાગરિકોના મોત વચ્ચે અમેરિકા તરફથી મોટું નિવેદન આવ્યું છે. અમેરિકાના રાષ્ટ્રપતિ જો બાઈડેને ઈઝરાયેલના પીએમ બેન્જામિન નેતન્યાહુ માટે મોટી વાત કહી. પોતાના જ મિત્ર વિરુદ્ધ તેમના નિવેદનથી દુનિયા ચોંકી ગઈ છે.
અમેરિકી રાષ્ટ્રપતિ જો બાઈડેને કહ્યું કે ‘ગાઝામાં ભારે બોમ્બમારો અને નિર્દોષ લોકો પર બોમ્બમારાથી ઈઝરાયેલ પોતાનું સમર્થન ગુમાવી રહ્યું છે. ઈઝરાયેલના વડાપ્રધાન નેતન્યાહુએ હવે પોતાની રણનીતિ બદલવી જોઈએ. બાઈડેનનું આ નિવેદન ઈઝરાયેલના પીએમ સાથેના સંબંધોમાં તિરાડ તરફ ઈશારો કરી રહ્યું છે. યુદ્ધ પછી ઇઝરાયલ વિરુદ્ધ આપવામાં આવેલા નિવેદનોમાં આ નિવેદન સૌથી વધુ આલોચનાત્મક હતું.
યુએસ પ્રમુખ બાઈડેન મંગળવારે એક કાર્યક્રમમાં હાજરી આપી હતી. જેમાં ચૂંટણી દરમિયાન તેમને ફંડ આપનારા લોકોનો પણ સમાવેશ થાય છે. આ કાર્યક્રમમાં ઘણા યહુદીઓએ પણ ભાગ લીધો હતો. આ દરમિયાન તેમણે કહ્યું કે ઈઝરાયેલની સુરક્ષા અમેરિકા પર નિર્ભર છે. અત્યારે અમેરિકા, યુરોપિયન યુનિયન અને મોટાભાગના દેશો ઈઝરાયેલની સાથે છે.પરંતુ હવે અંધાધૂંધ બોમ્બમારાથી ઈઝરાયેલ દરેકનું સમર્થન ગુમાવી રહ્યું છે. ગાઝાના અધિકારીઓના જણાવ્યા અનુસાર હમાસના હુમલા સામે ઈઝરાયેલની જવાબી કાર્યવાહીમાં 18 હજારથી વધુ લોકોના મોત થયા છે. 50 હજારથી વધુ પેલેસ્ટિનિયન નાગરિકો ઘાયલ થયા છે. ગાઝામાં માનવીય સંકટ છે.
