બેંગલુરુ:કર્ણાટક વિધાનસભા ચૂંટણી 2023ના પરિણામોનું કાઉન્ટડાઉન શરૂ થઈ ગયું છે. આજે (શનિવાર) સવારે 8 વાગ્યાથી મતગણતરી શરૂ થશે અને બપોર સુધીમાં પરિણામ આવી જવાની ધારણા છે. ચૂંટણી પંચે મતગણતરી માટે ખાસ વ્યવસ્થા કરી છે. રાજ્યમાં 224 વિધાનસભા બેઠકો માટે 2615 ઉમેદવારો મેદાનમાં છે. જેમાંથી 2,430 પુરૂષો અને 184 મહિલાઓ છે. આ ઉપરાંત થર્ડ જેન્ડર ઉમેદવાર પણ છે.
ભાજપના મુખ્યમંત્રી બસવરાજ બોમ્માઈ, કોંગ્રેસના પ્રદેશ અધ્યક્ષ ડીકે શિવકુમાર, પૂર્વ સીએમ સિદ્ધારમૈયા અને જેડીએસના વડા એચડી કુમારસ્વામી જેવા દિગ્ગજ ઉમેદવારોનું ચૂંટણી ભાવિ નક્કી થશે. હાલમાં, રાજ્યમાં ભાજપની સરકાર છે અને બસવરાજ બોમ્માઈ મુખ્યમંત્રી છે. આજે ભાજપના ભાવિનો ફેંસલો થશે. કારણ કે પાર્ટીને 38 વર્ષ જૂની ચૂંટણીની માન્યતા તોડવાની આશા છે. અહીં લોકોએ 1985થી સત્તામાં રહેલી પાર્ટીને ક્યારેય સરકાર બનાવવાની તક આપી નથી.
કર્ણાટકમાં 10 મેના રોજ મતદાન થયું હતું અને રેકોર્ડ 73.19 ટકા મતદાન થયું હતું. સત્તાધારી ભાજપ, કોંગ્રેસ અને પૂર્વ વડાપ્રધાન એચડી દેવગૌડાની જેડી(એસ) વચ્ચે ત્રિકોણીય મુકાબલો છે. જો કે એક્ઝિટ પોલમાં કોંગ્રેસને સ્પષ્ટ બહુમતી મળતી જોવા મળી રહી છે. જ્યારે ભાજપના હાથમાંથી સત્તા છૂટતી જોવા મળી રહી છે. હાલમાં ભાજપ પાસે 116 ધારાસભ્યો છે. કોંગ્રેસ પાસે 69, JD(S) 29, BSP એક અને બે અપક્ષ છે. આ ઉપરાંત છ બેઠકો ખાલી છે
ચૂંટણી પંચના જણાવ્યા અનુસાર રાજ્યભરના 36 કેન્દ્રો પર સવારે 8 વાગ્યાથી મતગણતરી શરૂ થશે અને બપોર સુધીમાં પરિણામ અંગે સ્પષ્ટ ચિત્ર ઉભરી આવે તેવી શક્યતા છે. સત્તાવાર સૂત્રોએ જણાવ્યું હતું કે રાજ્યભરમાં, ખાસ કરીને મતગણતરી કેન્દ્રોમાં અને તેની આસપાસ, કોઈપણ અનિચ્છનીય ઘટનાને ટાળવા માટે વિસ્તૃત સુરક્ષા વ્યવસ્થા કરવામાં આવી છે. મોટાભાગના એક્ઝિટ પોલમાં કોંગ્રેસ અને ભાજપ વચ્ચે ચુસ્ત ટક્કરનું અનુમાન છે.
મુખ્યમંત્રી બસવરાજ બોમ્માઈ (શિગાંવ), વિપક્ષના નેતા સિદ્ધારમૈયા (વરુણ), JD(S) નેતા એચડી કુમારસ્વામી (ચન્નાપટના), પ્રદેશ કોંગ્રેસ અધ્યક્ષ ડીકે શિવકુમાર (કનકપુરા) આ ચૂંટણીમાં ઉમેદવાર છે. આ સિવાય પૂર્વ સીએમ જગદીશ શેટ્ટર (હુબલી-ધારવાડ સેન્ટ્રલ) પણ ઉમેદવાર છે. શેટ્ટર તાજેતરમાં જ ભાજપ છોડીને કોંગ્રેસમાં જોડાયા છે. આ તમામ દિગ્ગજ નેતાઓના ચૂંટણી પરિણામો આવશે.
