15 સપ્ટેમ્બરે જ શા માટે મનાવવામાં આવે છે એન્જિનિયર્સ ડે,જાણો આ દિવસનો ઈતિહાસ અને થીમ
કોઈપણ દેશના વિકાસમાં એન્જિનિયરોની મહત્વની ભૂમિકા હોય છે. એન્જિનિયરોના યોગદાનથી જ દેશ આગળ વધે છે અને પ્રગતિ કરે છે. આ દિવસની ઉજવણી આ ઇજનેરો એટલે કે રાષ્ટ્ર નિર્માતાઓના યોગદાનને યાદ કરવા, પ્રશંસા કરવા અને સન્માન કરવા માટે કરવામાં આવે છે.પરંતુ શું તમે જાણો છો કે નેશનલ એન્જીનિયર્સ ડે માત્ર 15 સપ્ટેમ્બરે જ કેમ ઉજવવામાં આવે છે? જો નહીં તો આ લેખ તમારા માટે ઉપયોગી છે. તમે અહીંથી એન્જિનિયર્સ ડે અને આ વર્ષની થીમ વિશે સંપૂર્ણ માહિતી મેળવી શકો છો.
આપણા દેશમાં એમ વિશ્વેશ્વરાયની જન્મજયંતિની યાદમાં દર વર્ષે એન્જિનિયર્સ ડે ઉજવવામાં આવે છે. એમ વિશ્વેશ્વરાય એક મહાન એન્જિનિયરનો દરજ્જો ધરાવે છે અને તેથી જ તેમને 1955માં ભારતના સર્વોચ્ચ સન્માન ભારત રત્નથી નવાજવામાં આવ્યા હતા.આ સિવાય તેમને બ્રિટિશ નાઈટહુડ એવોર્ડથી પણ સન્માનિત કરવામાં આવ્યા હતા. એમ વિશ્વેશ્વરાયનો જન્મ 15 સપ્ટેમ્બર 1861ના રોજ થયો હતો. તેમની જન્મજયંતિ 15મી સપ્ટેમ્બર રાષ્ટ્રીય એન્જિનિયર્સ દિવસ તરીકે સમર્પિત કરવામાં આવી હતી.
આ વર્ષની થીમ
કોઈપણ દિવસની ઉજવણી કરવા માટે દર વર્ષે કોઈને કોઈ થીમ નક્કી કરવામાં આવે છે અને તે મુજબ તે દિવસની ઉજવણી કરવામાં આવે છે. નેશનલ એન્જિનિયર્સ ડે 2023 ની થીમ ‘Engineering for a Sustainable Future’ છે.
અન્ય દેશો આ તારીખે એન્જિનિયર્સ ડે ઉજવે છે
ભારત સિવાય અન્ય દેશોમાં પણ એન્જિનિયર્સને સન્માનિત કરવા માટે એન્જિનિયર્સ ડે ઉજવવામાં આવે છે, પરંતુ તે વિવિધ દેશોમાં અલગ-અલગ તારીખે ઉજવવામાં આવે છે.જ્યારે ભારતમાં આ દિવસ 15 સપ્ટેમ્બરે ઉજવવામાં આવે છે, ત્યારે તેના પાડોશી દેશ બાંગ્લાદેશમાં આ દિવસ દર વર્ષે 7 મે, ઇટાલીમાં 15 જૂન, ઈરાન 24 ફેબ્રુઆરી, રોમાનિયા 14 સપ્ટેમ્બર, બેલ્જિયમ 20 માર્ચે ઉજવવામાં આવે છે.
