વંદે ભારત એક્સપ્રેસ ટ્રેને બુલેટ ટ્રેનનો રેકોર્ડ તોડ્યો, શૂન્યથી 100 કિમી પ્રતિ કલાકની ગતિ માત્ર 52 સેકન્ડમાં હાંસલ કરી
નવી દિલ્હીઃ નવી વંદે ભારત એક્સપ્રેસે ટ્રાયલ રન દરમિયાન માત્ર 52 સેકન્ડમાં 0 થી 100 કિમી પ્રતિ કલાકની ઝડપ હાંસલ કરીને બુલેટ ટ્રેનનો રેકોર્ડ તોડી નાખ્યાનો રેલવે મંત્રી અશ્વિની વૈષ્ણવે દાવો કર્યો હતો. તેમણે એમ પણ કહ્યું કે ફોટોકેટાલિટીક એર પ્યુરિફાયર સિસ્ટમ નવી વંદે ભારત ટ્રેનને કોરોના સહિત તમામ વાયુજન્ય રોગોથી મુક્ત રાખશે. ભારતની આ સેમી-હાઈ સ્પીડ ટ્રેન આગામી થોડા અઠવાડિયામાં અમદાવાદ-મુંબઈ રૂટ પર દોડવા માટે તૈયાર હોવાનું ચર્ચાઈ રહ્યું છે.
ટ્રાયલ રનના પરિણામોની જાહેરાત કરતા રેલવે મંત્રી વૈષ્ણવે કહ્યું કે, “વંદે ભારત ટ્રેનની ત્રીજી ટ્રાયલ પૂર્ણ થઈ હતી. તેણે 0-100 કિમી પ્રતિ કલાકની સ્પીડ 52 સેકન્ડમાં પૂરી કરી, જ્યારે બુલેટ ટ્રેને આ સ્પીડ હાંસલ કરવામાં 54.6 સેકન્ડનો સમય લીધો હતો. આ નવી ટ્રેનની મહત્તમ સ્પીડ 180 kmph છે. જૂના વંદે ભારતની મહત્તમ ઝડપ 160 કિમી પ્રતિ કલાક છે. તેમણે વધુમાં ઉમેર્યું, “આ ટ્રેનમાં આરામદાયક મુસાફરી માટે ઘણી સુવિધાઓ છે. ગુણવત્તા અને રાઇડ ઇન્ડેક્સમાં સુધારો થયો છે. આ માપદંડ પર ટ્રેનનો સ્કોર 3.2 છે જ્યારે વૈશ્વિક સ્તરે શ્રેષ્ઠ સ્કોર 2.9 છે. ,
ફોટોકેટાલિટીક એર પ્યુરીફાયર સિસ્ટમ નવી વંદે ભારત ટ્રેનને કોરોના સહિત તમામ વાયુજન્ય રોગોથી મુક્ત રાખશે. રેલ્વે મંત્રાલય નવા વંદે ભારતમાં આ એન્ટી વાઈરસ સિસ્ટમને પાઈલટ પ્રોજેક્ટ તરીકે ઈન્સ્ટોલ કરવા જઈ રહ્યું છે. આ યોજના પ્રીમિયમ રાજધાની, શતાબ્દી, દુરંતો અને રેલવેની અન્ય ટ્રેનો સહિત તમામ 400 વંદે ભારત ટ્રેનોમાં લાગુ કરવામાં આવશે. ટ્રેને તેની અંતિમ ટ્રાયલ પૂર્ણ કરી લીધી છે અને તેના રૂટ અને દોડવાની જાહેરાત ટૂંક સમયમાં કરવામાં આવશે.
(PHOTO-FILE)
