દિલ્હી:કેન્દ્રીય ગૃહમંત્રી અમિત શાહ 23 સપ્ટેમ્બરે બિહારની બે દિવસીય મુલાકાતે જઈ રહ્યા છે.આ દરમિયાન તેઓ સીમાંચલના વિસ્તારોની મુલાકાત લેશે.સીએમ નીતિશ કુમારની પાર્ટી જેડીયુ સાથે ગઠબંધન તોડ્યા બાદ અમિત શાહની બિહારની આ પહેલી મુલાકાત છે.
મળતી માહિતી મુજબ, અમિત શાહ 23 સપ્ટેમ્બરે સવારે પૂર્ણિયા પહોંચશે. આ પછી તેઓ પૂર્ણિયામાં જ એક સભાને સંબોધશે.અહીંથી સભાને સંબોધિત કર્યા બાદ અમિત શાહ કિશનગંજ જશે.આ સાથે બીજેપીના તમામ સાંસદો, ધારાસભ્યો અને સીમાંચલના 4 જિલ્લાના સંગઠનના પદાધિકારીઓની બેઠક યોજાશે.આ સિવાય 24 સપ્ટેમ્બરે કેન્દ્રીય ગૃહમંત્રી બોર્ડર પર આવેલી BOP એટલે કે બોર્ડર આઉટ પોસ્ટની મુલાકાત લેશે
ગૃહમંત્રી અમિત શાહની મુલાકાત માટે બિહાર ભાજપના તમામ નેતાઓ હાલમાં તે વિસ્તારમાં પડાવ નાખી રહ્યા છે. ભાજપની આગેવાની હેઠળના એનડીએ સાથે સંબંધો તોડ્યા બાદ જનતા દળ યુનાઈટેડ અને ભાજપ વચ્ચે સતત ટક્કર ચાલી રહી છે. કેન્દ્રીય ગૃહમંત્રી અમિત શાહની આ અઠવાડિયે બિહારના સીમાંચલ વિસ્તારની બે દિવસીય મુલાકાત બાદ જનતા દળ યુનાઇટેડ (JDU) આગામી મંગળવારે દરેક બ્લોકમાં મોંઘવારી અને બેરોજગારીના મુદ્દે કેન્દ્ર સરકારને ઘેરશે.
