આતંકના પાલનહાર પાકિસ્તાનને જ હવે આતંકવાદનો ઝેરીલો ડંખ, એક વર્ષમાં 643 લોકોના મોત
નવી દિલ્હીઃ આતંકવાદીઓનું પાલનહાર ગણાતું પાકિસ્તાન હવે આતંકવાદી પ્રવૃતિઓનું શિકાર બની રહ્યું છે. પાકિસ્તાનમાં એક વર્ષના સમયગાળામાં આતંકવાદી હુમલામાં મૃત્યુના દરમાં લગભગ 120 ટકાનો વધારો થયો છે. પાકિસ્તાનમાં એક વર્ષમાં આતંકવાદી ઘટનામાં 643 વ્યક્તિઓના મોત થયાં છે. સૌથી વધારે આફ્રિકન દેશ હુર્કિના ફાસોમાં આતંકવાદી ઘટનાઓમાં 1135 વ્યક્તિઓના મૃત્યુ થયાં છે. આતંકવાદી ઘટનાઓ અને આતંકવાદને પ્રોત્સાહન આપનારા પાકિસ્તાનમાં 15 વર્ષમાં આતંકવાદી ઘટનાઓમાં 15 હજાર લોકોના મૃત્યુ થયાં છે.
પાકિસ્તાનમાં આતંકવાદી ઘટનાઓમાં માર્યા ગયેલા લોકોની સંખ્યામાં વર્ષ 2022માં રેકોર્ડ વધારો નોંધાયો છે. એક રિપોર્ટ અનુસાર, વર્ષ 2022માં પાકિસ્તાનમાં આતંકવાદી ઘટનાઓમાં 643 લોકોના મોત થયા હતા, જે અગાઉના વર્ષના 292 લોકોના મોતની સરખામણીમાં લગભગ 120 ટકા વધુ છે. ઓસ્ટ્રેલિયા સ્થિત ઈન્સ્ટિટ્યૂટ ફોર ઈકોનોમિક્સ એન્ડ પીસના વાર્ષિક ગ્લોબલ ટેરરિઝમ ઈન્ડેક્સનો ચોંકાવનારો રિપોર્ટ સામે આવ્યો છે. રિપોર્ટમાં કહેવામાં આવ્યું છે કે, અફઘાનિસ્તાનમાં આતંકવાદી ઘટનાઓમાં મૃત્યુની સંખ્યામાં ઘટાડો થયો છે.
વર્ષ 2022માં પાકિસ્તાનમાં આતંકવાદી ઘટનાઓમાં મૃત્યુઆંક બીજા ક્રમે છે. નંબર વન આફ્રિકાનો દેશ બુર્કિના ફાસો છે, જ્યાં 2022માં આતંકવાદી ઘટનાઓમાં 1135 લોકોના મોત થયા હતા. 2021 માં, બુર્કિના ફાસોમાં 759 લોકો મૃત્યુ પામ્યા હતા. પાકિસ્તાનમાં આતંકવાદી ઘટનાઓમાં મૃત્યુ પામેલા 55 ટકા લોકો સેના અથવા પોલીસ કર્મચારીઓ છે. ટીટીપી અને બલુચિસ્તાન લિબરેશન આર્મી પાકિસ્તાનમાં સૌથી ખતરનાક આતંકવાદી સંગઠનો છે, જેમણે પાડોશી દેશમાં ઘણા મોટા આતંકવાદી હુમલાઓ કર્યા છે.
રિપોર્ટ અનુસાર 2007થી 2022 સુધીમાં પાકિસ્તાનમાં આતંકી હુમલામાં 14,920 લોકોના મોત થયા છે. પાકિસ્તાનમાં અફઘાનિસ્તાન સરહદી વિસ્તારોમાં વધુ આતંકવાદી ઘટનાઓ બની છે. રિપોર્ટ અનુસાર, પાકિસ્તાનમાં કુલ આતંકવાદી ઘટનાઓમાંથી 63 ટકા ઘટનાઓ અફઘાનિસ્તાનની સરહદે આવેલા વિસ્તારોમાં બની છે. તે જ સમયે, કુલ મૃત્યુના 74 ટકા અહીં થયા છે. 2022માં પાકિસ્તાનમાં બલૂચિસ્તાન લિબરેશન આર્મીના હુમલામાં 77 ટકાનો વધારો થશે. પાકિસ્તાનમાં પણ ઈસ્લામિક સ્ટેટ ખોરાસાનનો પ્રભાવ વધી રહ્યો છે અને આ આતંકી સંગઠને 2022માં પાકિસ્તાનમાં 23 આતંકી હુમલા કર્યા હતા, જેમાં 78 લોકોના મોત થયા હતા.
