દિલ્હી :ઈન્ડિયન સ્પેસ રિસર્ચ ઓર્ગેનાઈઝેશન (ઈસરો) એ રવિવારે કહ્યું કે તેણે ચંદ્રયાન-3 મિશનના લેન્ડર મોડ્યુલ (LM)ને કક્ષામાં થોડું વધુ નીચે સફળતાપૂર્વક પહોંચાડી દીધું છે અને તેને ચંદ્રની નજીક લાવી દીધું છે. ISROએ જણાવ્યું હતું કે લેન્ડર (વિક્રમ) અને રોવર (પ્રજ્ઞાન) નું લેન્ડર મોડ્યુલ 23 ઓગસ્ટે સાંજે 6.04 કલાકે ચંદ્રની સપાટી પર પહોંચવાની અપેક્ષા છે. ISRO એ સોશિયલ મીડિયા પ્લેટફોર્મ X (અગાઉ ટ્વિટર) પર લખ્યું છે કે, “લેન્ડર મોડ્યુલ બીજા અને અંતિમ ડીબૂસ્ટિંગ (ધીમો પડવાના) ઓપરેશનમાં સફળતાપૂર્વક ભ્રમણકક્ષામાં વધુ નીચે ઉતરી ગયું છે.”
મોડ્યુલ હવે આંતરિક ચકાસણી પ્રક્રિયામાંથી પસાર થશે. ચંદ્રના દક્ષિણ ધ્રુવ પર ‘સોફ્ટ લેન્ડિંગ’ 23 ઓગસ્ટ, 2023 ના રોજ સાંજે 6:04 વાગ્યે અપેક્ષિત છે. ચંદ્રયાન -3 લેન્ડર મોડ્યુલ અને પ્રોપલ્શન મોડ્યુલ 14 જુલાઈના મિશનની શરૂઆત હોવાના 35 દિવસ બાદ ગુરુવારે સફળતાપૂર્વક અલગ થઇ ગયું હતું.ઈસરોના સૂત્રોએ અગાઉ જણાવ્યું હતું કે પ્રોપલ્શન મોડ્યુલથી અલગ થયેલ લેન્ડરને એવી ભ્રમણકક્ષામાં લાવવા માટે ‘ડીબૂસ્ટ’ (ધીમી પ્રક્રિયા) કરવામાં આવશે જ્યાં પેરીલ્યુન (ચંદ્રની ભ્રમણકક્ષાનું સૌથી નજીકનું બિંદુ) 30 કિમી છે અને એપોલ્યુન (ચંદ્રથી સૌથી દૂરનું બિંદુ) 100 કિમીના અંતરે હશે જ્યાંથી ચંદ્રના દક્ષિણ ધ્રુવ પ્રદેશ પર ‘સોફ્ટ લેન્ડિંગ’ કરવાનો પ્રયાસ કરવામાં આવશે.
ચંદ્રયાન-3 14 જુલાઈએ લોન્ચ થયા બાદ 5 ઓગસ્ટે ચંદ્રની ભ્રમણકક્ષામાં પ્રવેશ્યું હતું. 6, 9, 14 અને 16 ઓગસ્ટના રોજ તેને ચંદ્રની સપાટીની નજીક લાવવા માટે, પ્રોપલ્શન અને લેન્ડર મોડ્યુલોને અલગ કરતા પહેલા લો-ઓર્બિટ કવાયત હાથ ધરવામાં આવી હતી. હવે 23 ઓગસ્ટે ચંદ્ર પર તેનું ‘સોફ્ટ લેન્ડિંગ’ કરવાનો પ્રયાસ કરવામાં આવશે.અગાઉ, 14 જુલાઈના લોન્ચિંગ પછી છેલ્લા ત્રણ અઠવાડિયામાં પાંચથી વધુ પ્રક્રિયાઓમાં ઈસરોએ ચંદ્રયાન-3ને પૃથ્વીથી દૂર વધુ ભ્રમણકક્ષામાં આગળ વધાર્યું હતું. 1 ઓગસ્ટના રોજ, એક મહત્વપૂર્ણ કવાયતમાં અવકાશયાનને પૃથ્વીની ભ્રમણકક્ષામાંથી ચંદ્ર તરફ સફળતાપૂર્વક મોકલવામાં આવ્યું હતું.
