નવી દિલ્હીઃ દેશની રાજધાની દિલ્હીની શાળાઓને આજે ફરી એકવાર બોમ્બથી ઉડાવી દેવાની ધમકી મળી હતી. 50 શાળાઓને ધમકીભર્યા ઈમેલ મળ્યા હતા. નજફગઢની એક શાળા અને માલવિયા નગરની શાળાને ઈમેલ દ્વારા બોમ્બથી ઉડાવી દેવાની ધમકી મળી હતી. માહિતી મળ્યા બાદ સ્થાનિક પોલીસ ઘટનાસ્થળે પહોંચી ગઈ હતી. પોલીસની તપાસમાં કંઈ શંકાસ્પદ ન મળતા તંત્રએ રાહતનો શ્વાસ લીધો હતો. સુત્રોના જણાવ્યા અનુસાર, છેલ્લા કેટલાક દિવસોથી દિલ્હીની શાળાઓ અને કોલેજોને ઈમેલ દ્વારા બોમ્બથી ઉડાવી દેવાની ધમકી મળી રહી છે. ગયા સોમવારે મળેલી ધમકીમાં પૈસાની પણ માંગણી કરવામાં આવી છે. દિલ્હીની 32શાળાઓ પાસેથી 500 યુએસ ડોલરની માંગણી કરવામાં આવી હતી જેમને ગયા સોમવારે ધમકીભર્યા ઈમેલ મળ્યા હતા. જો પૈસા ચૂકવવામાં નહીં આવે તો શાળાઓને બોમ્બથી ઉડાવી દેવાની ધમકી આપવામાં આવી હતી. અગાઉ, શાળાઓ અને કોલેજો સહિત ઘણી શૈક્ષણિક સંસ્થાઓને મળેલા ધમકીભર્યા ઈમેલમાં પૈસાની માંગણી કરવામાં આવી ન હતી.
સ્પેશિયલ સેલના એક વરિષ્ઠ અધિકારીએ જણાવ્યું હતું કે દિલ્હીની 32 શાળાઓ, એટલે કે દક્ષિણ જિલ્લામાં 7, દક્ષિણ-પશ્ચિમ જિલ્લામાં 13, દ્વારકામાં 11 જેટલી શાળાને બોમ્બથી ઉડાવી દેવાની ધમકીભર્યા ઈમેલ મળ્યા હતા. પોલીસ અધિકારીઓએ જણાવ્યું હતું કે બધી શાળાઓને મળેલા મેઇલ સમાન છે અને બધા Gmail ID પરથી મોકલવામાં આવ્યા છે. પોલીસ અધિકારીઓએ જણાવ્યું હતું કે VPN નો ઉપયોગ મેઇલ મોકલવા માટે કરવામાં આવ્યો છે. આનો ઉપયોગ કરીને, મેઇલ મોકલ્યા પછી, IP સરનામું કોઈપણ દેશનું બની જાય છે.
સ્પેશિયલ સેલના ડેપ્યુટી પોલીસ કમિશનર અમિત કૌશિકે જણાવ્યું હતું કે VPN નો હજુ સુધી કોઈ ઉકેલ નથી. VPN પૂરી પાડતી એજન્સીઓ તેની વિગતો આપતી નથી. વરિષ્ઠ અધિકારીએ જણાવ્યું હતું કે ધમકીભર્યા મેઇલ મોકલ્યા પછી જ્યારે ગૂગલ પાસેથી માહિતી માંગવામાં આવી હતી, ત્યારે તેણે માહિતી આપવાનો ઇનકાર કર્યો હતો. ગૂગલે ફક્ત એટલું જ કહ્યું હતું કે ધમકીભર્યા મેઇલ વિદેશી IP સરનામાંથી મોકલવામાં આવ્યા હતા.
(PHOTO-FILE)
