સ્વાસ્થ્ય માટે સંજીવની: જાણો સવારે ખાલી પેટે ગરમ પાણી પીવાના ફાયદા, આ એક ભૂલથી બચો

આપણા શરીરમાં પાણીની ઉણપ માત્ર ત્વચા પર જ નહીં, પરંતુ કિડની અને લિવર જેવા મહત્વના અંગો પર પણ ગંભીર અસર કરે છે. ડોક્ટરો દિવસ દરમિયાન 2.5 થી 3 લિટર પાણી પીવાની સલાહ આપે છે, પરંતુ દિવસની શરૂઆત પાણીથી કરવી તે વધુ ફાયદાકારક છે. ફેલિક્સ હોસ્પિટલના ચેરમેન ડો. ડી.કે. ગુપ્તાના જણાવ્યા અનુસાર, સવારે ગરમ પાણી પીવાથી શરીર પર કેવી અસરો થાય છે તે જાણવું ખૂબ જરૂરી છે.

• સવારે ગરમ પાણી પીવાના મુખ્ય ફાયદા

પાચન અને કબજિયાતમાં રાહત: સવારે ખાલી પેટે ગરમ પાણી પીવાથી પેટ સાફ કરવામાં મદદ મળે છે. જે લોકોને વારંવાર કબજિયાત, ગેસ કે એસિડિટીની સમસ્યા રહેતી હોય, તેમના માટે ગરમ પાણી રામબાણ ઈલાજ છે. તે પાચનતંત્રને સક્રિય કરે છે.

શરીરનું હાઈડ્રેશન: રાત્રે 6 થી 8 કલાકની ઊંઘ દરમિયાન શરીર કંઈપણ લેતું નથી, જેના કારણે સવારે ઉઠતાની સાથે જ શરીરને હાઈડ્રેશનની જરૂર હોય છે. ગરમ પાણી પીવાથી શરીર ઝડપથી હાઈડ્રેટ થાય છે.

વેઈટ લોસ અને મેટાબોલિઝમ: ગરમ પાણી પીવાથી શરીરનું મેટાબોલિઝમ બુસ્ટ થાય છે. જોકે આ કોઈ જાદુઈ ઈલાજ નથી, પરંતુ તે વજન ઘટાડવાની પ્રક્રિયામાં ચોક્કસપણે સહાયક બને છે અને શરીરને ફિટ રાખે છે.

• ગરમ પાણી પીતી વખતે આ ભૂલો ન કરો

નિષ્ણાતો ચેતવણી આપે છે કે ગરમ પાણીના ફાયદા મેળવવા માટે કેટલીક બાબતોનું ધ્યાન રાખવું અનિવાર્ય છે:

તાપમાન: પાણી ખૂબ જ ગરમ ન હોવું જોઈએ. હંમેશા નવશેકું પાણી પીવું શ્રેષ્ઠ છે. અતિશય ગરમ પાણી મોઢા કે અન્નનળીના નાજુક પડને નુકસાન પહોંચાડી શકે છે.

પીવાની રીત: પાણી ક્યારેય પણ એકીસાથે કે ઉભા રહીને ન પીવું જોઈએ. હંમેશા બેસીને, ધીમે-ધીમે એક-એક ઘૂંટડો ભરીને પાણી પીવાની આદત પાડવી જોઈએ.

માત્રા: સવારે શરૂઆતમાં 1 કે 2 ગ્લાસ પાણી પૂરતું છે.

• જો શરીરમાં પાણી ઓછું હોય, તો શરીર આ સંકેતો આપે છે

હોઠ અને ગળું સુકાવું.

માથાનો દુખાવો, થાક અને ચક્કર આવવા.

પેશાબનો રંગ ઘેરો પીળો હોવો અથવા પેશાબ ઓછો આવવો.

ગંભીર કિસ્સામાં સ્નાયુઓમાં ખેંચાણ, હૃદયના ધબકારા વધવા અને શ્વાસ લેવામાં તકલીફ થઈ શકે છે.

સવારે ગરમ પાણીમાં લીંબુ કે મધ ઉમેરીને પીવાથી તેની અસર બમણી થઈ શકે છે, પરંતુ જો તમને કોઈ મેડિકલ કન્ડિશન હોય તો ડોક્ટરની સલાહ જરૂર લેવી.

આ પણ વાંચોઃએકબીજા પ્રત્યે સદભાવ રાખી, ભેદભાવ દૂર કરી, એકતાના સૂત્રને આત્મસાત કરીએઃ રાજ્યપાલ