આંતરરાષ્ટ્રીય હથિયાર તસ્કરી મોડ્યુલનો પર્દાફાશ, 21 અત્યાધુનિક વિદેશી હથિયારો સાથે 10 ઝડપાયા
નવી દિલ્હી, 25 માર્ચ 2026: દિલ્હી પોલીસની ક્રાઈમ બ્રાન્ચે એક મોટા આંતરરાષ્ટ્રીય આર્મ્સ ટ્રાફિકિંગ (હથિયાર તસ્કરી) મોડ્યુલનો પર્દાફાશ કરીને 10 તસ્કરોની ધરપકડ કરી છે. પકડાયેલા આરોપીઓ પાસેથી સબ-મશીન ગન સહિત 21 વિદેશી અને અત્યાધુનિક હથિયારોનો મોટો જથ્થો મળી આવ્યો છે. પોલીસની પ્રાથમિક તપાસમાં ચોંકાવનારો ખુલાસો થયો છે કે આ આખું નેટવર્ક જૂની દિલ્હીના (વૉલ સિટી) વિસ્તારમાંથી ઓપરેટ થઈ રહ્યું હતું. આ આંતરરાષ્ટ્રીય તસ્કરી રેકેટના તાર પાકિસ્તાન, નેપાળ અને બાંગ્લાદેશ સુધી જોડાયેલા હોવાનું સામે આવ્યું છે. તપાસ એજન્સીઓના જણાવ્યા અનુસાર, આ ઘાતક હથિયારો પાકિસ્તાનથી તસ્કરી કરીને વાયા નેપાળ બોર્ડર થઈને ભારતમાં ઘુસાડવામાં આવતા હતા.
ભારતમાં લાવવામાં આવ્યા બાદ, આ હથિયારો દિલ્હી-NCR અને દેશના અન્ય રાજ્યોમાં સક્રિય ગુનાહિત ગેંગ અને માફિયાઓને સપ્લાય કરવામાં આવતા હતા. ક્રાઈમ બ્રાન્ચે કુલ 21 વિદેશી હથિયારો જપ્ત કર્યા છે, જેમાં સબ-મશીન ગન, પીએક્સ-5.7 પિસ્તોલ, પીએક્સ-3 પિસ્તોલ, શેડો સીઝેટ પિસ્તોલ, બેરેટા પિસ્તોલ, ટોરસ પિસ્તોલ, વોલ્થર પિસ્તોલનો સમાવેશ થાય છે. જંગી માત્રામાં મોતનો સામાન મળી આવતા પોલીસ અધિકારીઓ પણ ચોંકી ઉઠ્યાં હતા.
આ જપ્તીમાં સૌથી વધુ ચિંતાનો વિષય પીએક્સ-5.7 મળી આવવી તે છે. સંરક્ષણ નિષ્ણાતોના મતે, આ પિસ્તોલનો ઉપયોગ સામાન્ય રીતે માત્ર સ્પેશિયલ ફોર્સ દ્વારા જ કરવામાં આવે છે. ગુનેગારોના હાથમાં આવા અદ્યતન સૈન્ય હથિયારો પહોંચવા એ આંતરિક સુરક્ષા માટે મોટો ખતરો સાબિત થઈ શકે છે. હાલમાં દિલ્હી પોલીસની ક્રાઈમ બ્રાન્ચ આ 10 આરોપીઓની સઘન પૂછપરછ કરી રહી છે, જેથી આ સિન્ડિકેટ સાથે જોડાયેલા અન્ય સ્લીપર સેલ અને લોકલ ખરીદદારો સુધી પહોંચી શકાય.
આ પણ વાંચોઃ રાજસ્થાન રોયલ્સ 15286 કરોડ રૂપિયામાં વેચાઈ, આઈપીએલની સૌથી મોંઘી ટીમ બની
