છત્તીસગઢમાં લાલ આતંકનો સફાયો: બસ્તરનો 96 ટકા વિસ્તાર નક્સલમુક્ત
રાયપુર, 26 માર્ચ 2026: નક્સલ પ્રભાવિત છત્તીસગઢ રાજ્યમાંથી વામપંથી ઉગ્રવાદને જડમૂળથી ઉખેડી નાખવા માટે કેન્દ્રીય ગૃહમંત્રી અમિત શાહે 31 માર્ચની જે સમયસીમા નક્કી કરી હતી, તે હવે પૂર્ણતાના આરે છે. આ દરમિયાન બસ્તરના જગદલપુરમાં એક મહત્વપૂર્ણ પ્રેસ કોન્ફરન્સને સંબોધતા ગૃહ રાજ્ય મંત્રી અને નાયબ મુખ્યમંત્રી વિજય શર્માએ રાજ્યની સુરક્ષા અને ભવિષ્ય અંગે મોટી જાહેરાતો કરી છે.
વિજય શર્માએ જણાવ્યું હતું કે, બસ્તરનો અંદાજે 96 ટકા ભૌગોલિક વિસ્તાર હવે નક્સલી પ્રભાવ અને હિંસાથી મુક્ત થઈ ગયો છે. તેમણે ગૌરવ સાથે જાહેર કર્યું કે, “આજે આખું છત્તીસગઢ અને ખાસ કરીને બસ્તર ‘લાલ આતંક’ના ચુંગાલમાંથી બહાર આવી ગયું છે. હવે આ વિસ્તાર વિકાસના પથ પર તેજ ગતિએ આગળ વધવા તૈયાર છે.”
છેલ્લા એક દાયકામાં સુરક્ષા દળોએ બસ્તરમાં સુરક્ષા વ્યવસ્થા મજબૂત કરવા માટે 400 થી વધુ પોલીસ કેમ્પ સ્થાપિત કર્યા છે, જેમાંથી 120 કેમ્પ તો છેલ્લા બે વર્ષમાં જ બનાવવામાં આવ્યા છે. મંત્રીએ જણાવ્યું કે, બસ્તરના સરહદી વિસ્તારોમાં હવે માત્ર 35-40 માઓવાદી કેડર જ બચ્યા છે. આ 400 કેમ્પનો ઉપયોગ હવે પોલીસિંગ ઉપરાંત શાળાઓ, હોસ્પિટલો અને અન્ય વિકાસલક્ષી જરૂરિયાતો માટે કરવામાં આવશે. હાલમાં આ કેમ્પ ‘ઇન્ટિગ્રેટેડ ડેવલપમેન્ટ સેન્ટર્સ’ તરીકે કામ કરી રહ્યા છે, જે નાગરિકો સુધી સરકારી યોજનાઓ અને આરોગ્ય સેવાઓ પહોંચાડે છે.
નક્સલ વિરોધી અભિયાનની સફળતામાં ટેકનોલોજીનો મોટો ફાળો રહ્યો છે. નાયબ મુખ્યમંત્રીએ આ અભિયાનમાં ISRO, NTRO, ITBP ની ટેકનિકલ પાંખ અને NSG ના બોમ્બ ડિસ્પોઝલ સ્ક્વોડ જેવી એજન્સીઓ દ્વારા પૂરી પાડવામાં આવેલી મદદની પ્રશંસા કરી હતી.
માઓવાદીઓના છેલ્લા જીવિત ટોપ લીડર્સમાંના એક એવા પાપા રાવે તેના 17 સાથીઓ સાથે આત્મસમર્પણ કરી દીધું છે. રાજ્ય સરકારની ‘પૂના માર્ગેમ’ (પુનર્વસનથી સમાજની મુખ્યધારામાં જોડાવા સુધીની) યોજના હેઠળ આ શરણાગતિ થઈ છે. મુખ્યમંત્રી વિષ્ણુ દેવ સાયએ આને નક્સલવાદના ખાતમાની દિશામાં એક મોટું પગલું ગણાવ્યું છે અને કહ્યું છે કે આ સફળતા વડાપ્રધાન નરેન્દ્ર મોદી અને અમિત શાહના વિઝનનું પરિણામ છે.
આ પણ વાંચો : જમ્મુ-કાશ્મીરમાં હાઈ એલર્ટ: આતંકીઓના મોટા IED હુમલાના કાવતરાનો ગુપ્ત રિપોર્ટ
