કોલકાતા, 03 સપ્ટેમ્બર 2026: બંગાળના બાંકુરા જિલ્લામાં વરસાદ દરમિયાન ઘરની દીવાલો ધરાશાયી થવાથી ત્રણ લોકોનાં મોત નીપજ્યાં હતાં. આ ઘટનાઓ બની તે સમયે તેઓ તમામ પોતપોતાના ઘરમાં સૂતા હતા. પ્રથમ ઘટના સોનામુખી પોલીસ સ્ટેશન વિસ્તાર હેઠળના કુંડાપુષ્કરિણી ગામમાં બની હતી, જ્યાં 76 વર્ષીય બેલી રુઈદાસ તેમના પુત્ર અને પુત્રવધૂ સાથે માટીના ઘરમાં રહેતાં હતાં.
મંગળવારે રાત્રે સતત પડેલા વરસાદને કારણે ઘરની દીવાલ નબળી પડી ગઈ હતી. જોખમનો અહેસાસ થતાં પુત્ર અને પુત્રવધૂ તો ઘરની બહાર નીકળી શક્યા, પરંતુ બેલી અંદર જ રહી ગઈ. તે જ સમયે દીવાલ ધરાશાયી થઈ અને તેની ઉપર આવી પડી.
કાટમાળ નીચે દટાઈ જવાથી તેઓના મોત થયા હતા. પોલીસે મૃતદેહને પોસ્ટમોર્ટમ માટે બિષ્ણુપુર જિલ્લા હોસ્પિટલમાં મોકલી આપ્યો છે. બીજી ઘટના સિમલાપાલના કુશ્તોડા ગામના આદિવાસી વિસ્તારમાં બની હતી.
મંગળવારે રાત્રે પાલકુ બાસ્કે તેમની પત્ની સોમા બાસ્કે સાથે ઘરે સૂતા હતા. સતત વરસાદ વચ્ચે અચાનક માટીની દીવાલ ધરાશાયી થઈ અને તેઓ બંને તેની નીચે દબાઈ ગયા. પડોશીઓએ તેમને કાટમાળમાંથી બહાર કાઢ્યા અને પોલીસને જાણ કરી.
બંનેને સિમલાપાલ બ્લોક પ્રાથમિક આરોગ્ય કેન્દ્રમાં લઈ જવામાં આવ્યા હતા, જ્યાં તબીબોએ તેમને મૃત જાહેર કર્યા હતા. પોલીસે બંને કિસ્સામાં અકુદરતી મૃત્યુના કેસ નોંધીને તપાસ શરૂ કરી છે. મૃતદેહોને પોસ્ટમોર્ટમ માટે બાંકુરા સંમિલની મેડિકલ કોલેજ અને હોસ્પિટલમાં મોકલવામાં આવ્યા છે.
વધુ વાંચો: ક્વિન્ટન ડી કોકે રચ્યો ઈતિહાસ, વિરાટ કોહલીના સદીના રેકોર્ડની બરાબરી કરી
