નવી દિલ્હી, 17 ઓક્ટોબર 2026: કોકરોચ જનતા પાર્ટી (સીજેપી) ના સ્થાપક અભિજીત દિપકેને દિલ્હીની કોર્ટે શરતી જામીન મંજૂર કર્યા છે. દિલ્હી પોલીસના જણાવ્યા અનુસાર, રૂ. 50 હજારના પર્સનલ બોન્ડ અને ‘પીસ બોન્ડ’ (શાંતિ કરાર) પર સહી કર્યા બાદ તેમને મુક્ત કરવામાં આવશે. કનોટ પ્લેસ ખાતે પ્રસ્તાવિત ‘લહરા દો તિરંગા’ માર્ચ પહેલાં કાયદો અને વ્યવસ્થા જાળવવાના ભાગરૂપે તેમની એહતિયાતી અટકાયત કરવામાં આવી હતી.
અભિજીત દિપકેને ભારતીય નાગરિક સુરક્ષા સંહિતાની કલમ હેઠળ શાંતિ ભંગ કરવાના આશંકાના કેસમાં કસ્ટડીમાં લેવામાં આવ્યા હતા. શનિવારે તેમને સ્પેશિયલ એક્ઝિક્યુટિવ મેજિસ્ટ્રેટની અદાલતમાં રજૂ કરવામાં આવ્યા હતા, જ્યાંથી તેમને જામીન મળ્યા હતા. અગાઉ, સીજેપીના પ્રતિનિધિઓએ આરોપ લગાવ્યો હતો કે દિપકેને નવી દિલ્હી સ્થિત તેમના નિવાસસ્થાનેથી અટકાયતમાં લઈને અજ્ઞાત સ્થળે લઈ જવામાં આવ્યા હતા અને વકીલો સાથે તાત્કાલિક મળવાની મંજૂરી આપવામાં આવી નહોતી.
બીજી તરફ, ઓલ ઈન્ડિયા સ્ટુડન્ટ્સ એસોસિએશનના પ્રમુખ નેહા બોરાને શનિવારે સવારે જ કસ્ટડીમાંથી મુક્ત કરવામાં આવ્યા હતા. જેલમાંથી બહાર આવ્યા બાદ નેહા બોરાએ દિલ્હી પોલીસ અને કેન્દ્ર સરકાર પર આકરા પ્રહારો કરતા પોલીસ કાર્યવાહીને સંપૂર્ણપણે ‘ગેરકાયદે’ ગણાવી હતી. તેમણે જણાવ્યું હતું કે, “મને મંડી હાઉસથી અટકાયતમાં લેવામાં આવી હતી અને સવારે ૫ વાગ્યા સુધી પોલીસ સ્ટેશનમાં રાખવામાં આવી હતી. પોલીસ કાયદો અને વ્યવસ્થાનું પાલન કરવાનો દાવો કરે છે, પરંતુ વાસ્તવિકતા અલગ છે. સેન્ટ્રલ દિલ્હીમાં કરફ્યુ જેવો માહોલ પૂરો કરવો જોઈએ.” આ સાથે તેમણે આંદોલન દરમિયાન અટકાયતમાં લેવાયેલા તમામ પ્રદર્શનકારીઓને તાત્કાલિક મુક્ત કરવાની પણ માગ કરી હતી.
