નીટ પરીક્ષા માટે અમદાવાદ પોલીસનો માસ્ટર પ્લાન, 23 સેન્ટરો પર લોખંડી બંદોબસ્ત

અમદાવાદ, 20 જૂન 2026: દેશભરમાં મેડિકલના અભ્યાસક્રમોમાં એડમિશન મેળવવા માટેની અત્યંત પ્રતિષ્ઠિત અને મહત્વની ગણાતી નીટની પરીક્ષા આવતીકાલે અમદાવાદ શહેરમાં યોજાવા જઈ રહી છે. પરીક્ષા દરમિયાન કોઈપણ પ્રકારની ગેરરીતિ, નકલ કે પેપર લીક જેવી નકારાત્મક પ્રવૃત્તિઓ ન થાય અને વિદ્યાર્થીઓ સંપૂર્ણપણે તણાવમુક્ત વાતાવરણમાં પરીક્ષા આપી શકે તે માટે અમદાવાદ શહેર પોલીસ કમિશનર દ્વારા એક સઘન માસ્ટર સિક્યુરિટી પ્લાન જાહેર કરવામાં આવ્યો છે. આ પ્લાન અંતર્ગત શહેરના અલગ-અલગ વિસ્તારોમાં આવેલા 23 નિયત પરીક્ષા કેન્દ્રોની આસપાસ લોખંડી પોલીસ બંદોબસ્ત ગોઠવી દેવામાં આવ્યો છે.

આ વર્ષે પરીક્ષાને પારદર્શક અને નકલરહિત બનાવવા માટે ડિજિટલ ટેકનોલોજીનો મહત્તમ ઉપયોગ કરવામાં આવી રહ્યો છે. અમદાવાદ પોલીસ કમિશનર કચેરી ખાતે આવેલા સેન્ટ્રલ કમાન્ડ એન્ડ કંટ્રોલ રૂમથી તમામ 23 પરીક્ષા કેન્દ્રો અને તેની આસપાસની ગતિવિધિઓનું સીધું લાઈવ મોનિટરિંગ કરવામાં આવશે. દરેક સેન્ટરની બહાર ખાસ ‘મૂવિંગ સીસીટીવી કેમેરા’ લગાવવામાં આવ્યા છે, જે શંકાસ્પદ હલચલને તુરંત પકડી પાડશે. આ ઉપરાંત, પરીક્ષા કેન્દ્રોની બહાર વાલીઓ કે અન્ય લોકોની બિનજરૂરી ભીડ એકત્ર ન થાય અને અસામાજિક તત્વો પર કડક નજર રાખી શકાય તે માટે 8 અત્યાધુનિક ડ્રોન કેમેરા આકાશમાંથી સતત પેટ્રોલિંગ કરશે. રાષ્ટ્રીય સ્તરની પરીક્ષા એજન્સી NTA ની તમામ કડક ગાઈડલાઈનનું પાલન કરાવવા માટે અમદાવાદ પોલીસ તંત્ર સંપૂર્ણપણે પ્રતિબદ્ધ છે.

• પેપર લાવવા-લઈ જવા માટે ખાસ પોલીસ પ્રોટેક્શન અને ગ્રીન કોરિડોર

પરીક્ષાની ગોપનીયતા જાળવવા માટે સરકારી ટ્રેઝરી અથવા મુખ્ય સેન્ટર પરથી પ્રશ્નપત્રોને સંબંધિત 23 કેન્દ્રો સુધી સુરક્ષિત પહોંચાડવા માટે અમદાવાદ પોલીસ દ્વારા સ્પેશિયલ એસ્કોર્ટ (સુરક્ષા વાહનોનો કાફલો) અને ચુસ્ત સિક્યુરિટી ફાળવવામાં આવી છે. આ મેગા ઓપરેશનમાં કોઈ પણ પ્રકારની વહીવટી કે સુરક્ષા ક્ષતિ ન રહી જાય તે માટે 6 ડીસીપી (DCP) અને 15 પીઆઈ (PI) કક્ષાના વરિષ્ઠ અધિકારીઓ સીધા ગ્રાઉન્ડ ઝીરો પર રહીને મોનિટરિંગ કરશે.

આ સાથે જ, વિદ્યાર્થીઓને પોતાના પરીક્ષા કેન્દ્ર સુધી સમયસર પહોંચવામાં ટ્રાફિકની કોઈ સમસ્યા ન નડે તે માટે શહેરના 15 સ્થાનિક પોલીસ સ્ટેશનના સ્ટાફની સાથે 14 ટ્રાફિક પોલીસ સ્ટેશનની ટીમોને પણ રોડ કલિયરન્સ અને ટ્રાફિક મેનેજમેન્ટ માટે રસ્તા પર તૈનાત કરી દેવામાં આવી છે. પોલીસ તંત્ર દ્વારા વાલીઓ અને ઉમેદવારોને પણ ટ્રાફિક નિયમોનું પાલન કરવા અને સમયસર કેન્દ્ર પર પહોંચવા અપીલ કરવામાં આવી છે.