બિઝનેસ ટ્રિપ પર ભારત આવેલા અમેરિકન નાગરિકનું મોત, હૈદરાબાદની હોટલમાંથી મળી લાશ!

હૈદરાબાદ, 07 નવેમ્બર 2026: હૈદરાબાદના ગાચીબોવલીમાં SLN ટર્મિનસ ખાતે આવેલી ‘મેરિયોટ એક્ઝિક્યુટિવ એપાર્ટમેન્ટ્સ’ (Marriott Executive Apartments) હોટેલના એક રૂમમાં, 41 વર્ષીય અમેરિકન નાગરિક શંકાસ્પદ સંજોગોમાં મૃત હાલતમાં મળી આવ્યા હતા.

સાયબરાબાદ કમિશનરેટ હેઠળની ગાચીબોવલી પોલીસે શંકાસ્પદ મૃત્યુનો કેસ નોંધ્યો છે અને મૃત્યુના સંજોગો જાણવા માટે તપાસ શરૂ કરી છે.

બિઝનેસ ટ્રિપ પર ભારત આવેલા મિશેલ

મૃત અમેરિકન નાગરિકની ઓળખ કેલિફોર્નિયાના રહેવાસી મિશેલ બ્રાયન લી તરીકે થઈ છે. તેઓ ૨જી નવેમ્બરે વ્યવસાયિક પ્રવાસ માટે આ શહેરમાં આવ્યા હતા અને તેમની સાથે તેમના વ્યવસાયિક ભાગીદાર ડેવિડ પણ હતા. તેઓ બંને આ હોટલમાં રોકાયા હતા.

પ્રારંભિક માહિતી મુજબ, લી 12મા માળે આવેલા રૂમ નંબર 1218માં રોકાયા હતા. 4 નવેમ્બરની સાંજથી તેમણે ફોન કોલ્સનો જવાબ આપવાનું બંધ કરી દીધું હતું. જ્યારે તેમનો સંપર્ક કરવાના અનેક પ્રયાસો નિષ્ફળ ગયા, ત્યારે હોટેલના કર્મચારીઓને શંકા ગઈ.

મિશેલ પલંગ પર બેભાન અવસ્થામાં મળી આવ્યો

5 નવેમ્બરના રોજ સાંજે લગભગ 6:30 વાગ્યે, હોટેલના કર્મચારીઓએ માસ્ટર કીનો ઉપયોગ કરીને રૂમ ખોલ્યો અને લીને પલંગ પર બેભાન અવસ્થામાં જોયો. તેમણે તાત્કાલિક 108 ઈમરજન્સી એમ્બ્યુલન્સ સેવાને જાણ કરી. હોટેલ પર પહોંચ્યા બાદ, તબીબી સ્ટાફે તપાસ કરી અને પુષ્ટિ કરી કે તેમનું અવસાન થયું હતું.

પોલીસે જણાવ્યું, “ઘટનાસ્થળે પહોંચેલા તબીબી સ્ટાફે વ્યક્તિની તપાસ કરી અને પુષ્ટિ કરી કે તેમનું મૃત્યુ થઈ ચૂક્યું હતું.” હોટેલ વ્યવસ્થાપન પાસેથી માહિતી મળ્યા બાદ, ગાચીબોવલી પોલીસ હોટેલે પહોંચી, ઘટનાસ્થળની તપાસ કરી અને કેસ નોંધ્યો.

પોલીસ હાલમાં લીના મૃત્યુના સંજોગોની તપાસ કરી રહી છે. પોસ્ટમોર્ટમનાં પરિણામોથી મૃત્યુના કારણ અંગે વધુ સ્પષ્ટતા મળવાની અપેક્ષા છે.

વધુ વાંચો: પેટ્રોલમાં એથનોલની વધુ માત્રાના દાવા પર કેન્દ્ર સરકારનો ખુલાસો! પેટ્રોલિયમ મંત્રાલયે અહેવાલોને ફગાવ્યા