તહેવારોની સિઝન શરૂ થતાં જ ઘરની સાફ-સફાઈ, ખરીદી અને અન્ય કામોમાં આખો દિવસ નીકળી જાય છે. આવી સ્થિતિમાં ન તો પાર્લર જવાનો સમય મળે છે અને ન તો ત્વચાની યોગ્ય કાળજી રાખી શકાય છે. ઉપરથી ભાગદોડના કારણે ચહેરો પણ થાકેલો અને બેજાન દેખાવા લાગે છે. દિવાળી પર દરેક વ્યક્તિ સુંદર દેખાવા માંગે છે, પરંતુ તેના માટે દર વખતે મોંઘી પ્રોડક્ટ્સ ખરીદવી કે પાર્લર જવું જરૂરી નથી. તમારા રસોડામાં જ એવી ઘણી કુદરતી ચીજો ઉપલબ્ધ છે, જેનાથી તમે ઘરે જ સરળતાથી ફેસપેક તૈયાર કરી શકો છો. દિવાળી પહેલા ચહેરાને ક્લીન અને ફ્રેશ રાખવા માટે અજમાવો આ 5 સરળ ઘરેલું ફેસપેક:
- બેસન અને દહીંનો ફેસપેક
જો તમારી ત્વચા ઓઇલી અને બેજાન દેખાઈ રહી છે, તો બેસન અને દહીંનો પેક શ્રેષ્ઠ છે. બેસન ત્વચા પરથી વધારાનું તેલ દૂર કરે છે, જ્યારે દહીં ત્વચાને સોફ્ટ બનાવે છે.
બનાવવાની રીત: એક બાઉલમાં બે ચમચી બેસન અને બે ચમચી સાદું દહીં મિક્સ કરીને ઘટ્ટ પેસ્ટ બનાવો. તેને ચહેરા અને ગરદન પર 10 થી 15 મિનિટ લગાવી રાખો અને પછી સાદા પાણીથી ધોઈ લો.
-
હળદર અને મધનો ફેસપેક
તહેવારના દિવસોમાં ચહેરો થાકેલો દેખાય તો હળદર અને મધનો ઉપયોગ કરી શકો છો. હળદર ત્વચાની સોજા અને ડલનેસ ઘટાડે છે, જ્યારે મધ ભેજ (નમી) જાળવી રાખે છે.
બનાવવાની રીત: એક ચમચી મધમાં એક ચપટી હળદર મિક્સ કરો. તેને ચહેરા પર હળવા હાથે લગાવીને 10 મિનિટ બાદ ધોઈ લો. (હળદરનું પ્રમાણ ઓછું રાખવું જેથી ચહેરા પર પીળાશ ન રહે).
- એલોવેરા અને કાકડીનો ફેસપેક
જો દિવાળીની ખરીદી દરમિયાન તમારે તડકામાં બહાર જવું પડતું હોય અને ચહેરો ડલ થઈ ગયો હોય, તો આ પેક રાહત આપશે. કાકડી ત્વચાને ઠંડક આપે છે અને એલોવેરા મોઈશ્ચર જાળવી રાખે છે.
બનાવવાની રીત: એક નાની કાકડીનું છીણ કરીને બે ચમચી રસ કાઢો. તેમાં એક ચમચી એલોવેરા જેલ મિક્સ કરી ચહેરા પર 15 મિનિટ લગાવો અને પછી પાણીથી સાફ કરી લો.
-
ઓટ્સ અને દૂધનો ફેસપેક
દિવાળી પહેલા જો તમારી ત્વચા ડ્રાય અને ખેંચાયેલી અનુભવાતી હોય, તો ઓટ્સ અને દૂધનો ફેસપેક ખૂબ જ ગુણકારી સાબિત થશે.
બનાવવાની રીત: બે ચમચી ઓટ્સને બારીક પીસી લો. તેમાં એકથી બે ચમચી કાચું દૂધ મિક્સ કરી પેસ્ટ બનાવો. તેને 15 મિનિટ ચહેરા પર રાખી હળવા હાથે મસાજ કરીને ધોઈ લો.
- કેળું અને મધનો ફેસપેક
ડ્રાય અને નિર્જીવ ત્વચા માટે પાકેલું કેળું અને મધ જાદુઈ અસર કરે છે. કેળું ત્વચાને મુલાયમ બનાવે છે અને મધ કુદરતી ચમક આપે છે.
બનાવવાની રીત: અડધા પાકેલા કેળાને સારી રીતે મેશ કરી લો અને તેમાં એક ચમચી મધ મિક્સ કરો. આ સ્મૂથ પેસ્ટને ચહેરા પર 15 મિનિટ લગાવીને સામાન્ય પાણીથી ધોઈ લો. પેક દૂર કર્યા બાદ મોઈશ્ચરાઈઝર લગાવવાનું ભૂલશો નહીં.
