શિયાળાની મોર્નિંગ હોય અને હૂંફાળો તડકો નીકળ્યો હોય, તો અગાશી કે બાલ્કનીમાં બેસીને ચાની ચૂસ્કી લેવાની મજા જ કંઈક અલગ છે. ઠંડીની સિઝનમાં તડકો સેકવાથી શરીરને હૂંફ તો મળે જ છે, સાથે જ વિટામિન-ડી મેળવવામાં પણ મદદ મળે છે. પરંતુ જ થોડુ વિચારો, જે તડકાને તમે સ્વાસ્થ્ય માટે ઉત્તમ માનીને દરરોજ બેસો છો, તે જ તડકો કેટલીક નાની-નાની ભૂલોના કારણે તમારા માટે નુકસાનકારક સાબિત થઈ શકે છે. ઘણા લોકો એવું વિચારે છે કે શિયાળામાં તડકો તીવ્ર નથી હોતો, તેથી ત્વચાને કોઈ નુકસાન નહીં થાય. આ જ વિચારસરણીના કારણે તેઓ કોઈ પણ સાવચેતી વગર કલાકો સુધી તડકામાં બેસી રહે છે. જો તમે પણ આ ભૂલો કરો છો, તો સચેત થઈ જવાની જરૂર છે. તડકો સેકતી વખતે થતી આ 5 સામાન્ય ભૂલો તમારી ત્વચા અને આંખોને નુકસાન પહોંચાડી શકે છે:
કલાકો સુધી સતત તડકામાં બેસી રહેવું
શિયાળામાં તડકો એટલો સારો લાગે છે કે અગાશી કે બાલ્કનીમાં ન્યૂઝપેપર કે મોબાઈલ લઈને કલાકો વિતાવી દેવા સામાન્ય વાત છે. પરંતુ, સૂર્યના કિરણોમાં રહેલા યુવી રેઝ ત્વચા પર માઠી અસર કરી શકે છે. તેના વધુ પડતા સંપર્કમાં રહેવાથી ત્વચા લાલ થઈ જવી, બળતરા થવી અને ટેનિંગ જેવી સમસ્યાઓ થઈ શકે છે. તેથી, તડકો ગમે તેટલો સારો લાગતો હોય, પણ કલાકો સુધી સતત ન બેસવું. થોડીવાર તડકો સેક્યા બાદ છાંયામાં જતા રહેવું.
શિયાળામાં પણ ‘સનસ્ક્રીન’ ન લગાવવું
ઉનાળામાં તો મોટાભાગના લોકો બહાર નીકળતા પહેલા સનસ્ક્રીન લગાવે છે, પરંતુ શિયાળો આવતા જ તેને બંધ કરી દે છે. તેમને લાગે છે કે ઠંડીમાં તડકો નબળો હોય છે. પરંતુ વાસ્તવિકતા એ છે કે શિયાળાના તડકામાં પણ યુવી કિરણો ત્વચાને પ્રભાવિત કરે છે. આથી, જો તમે રોજ તડકામાં બેસતા હોવ તો ચહેરા, ગર્દન અને હાથ પર SPF 30 કે તેથી વધુનું બ્રોડ-સ્પેક્ટ્રમ સનસ્ક્રીન અચૂક લગાવવું.
તડકામાં બેસીને સીધા સૂર્ય સામે જોવું
ઘણા લોકોને તડકો સેકતી વખતે પોતાનો ચહેરો સીધો સૂર્યની દિશામાં રાખીને બેસવાની આદત હોય છે. પરંતુ આવું કરવું આંખો માટે હાનિકારક છે. સૂર્યનો તેજ પ્રકાશ અને યુવી કિરણો આંખોને નુકસાન પહોંચાડી શકે છે. તડકામાં બેસતી વખતે ક્યારેય સીધા સૂર્ય સામે ન જોવું. જો અગાશી કે બાલ્કનીમાં તડકો ખૂબ તીવ્ર હોય, તો યુવી પ્રોટેક્શનવાળા સનગ્લાસ (ચશ્મા) પહેરવા જોઈએ.
તડકો સેકતી વખતે પાણી ન પીવું
ઉનાળામાં લોકો વારંવાર પાણી પીએ છે, પરંતુ શિયાળામાં તરસ ઓછી લાગતી હોવાથી પાણી પીવાનું ભૂલી જવાય છે. ખાસ કરીને જ્યારે લોકો છત પર બેસીને ચા પીતા હોય ત્યારે પાણીનું ધ્યાન રહેતું નથી. તડકામાં વધુ સમય બેસવાથી પરસેવો થઈ શકે છે, જેનાથી શરીરમાં પાણીની ઉણપ (ડિહાઇડ્રેશન) સર્જાઈ શકે છે. આનાથી માથાનો દુખાવો, થાક અને ચક્કર આવવા જેવી સમસ્યાઓ થઈ શકે છે. તેથી, તડકામાં બેસો ત્યારે પાણીની બોટલ સાથે રાખો અને વચ્ચે-વચ્ચે પાણી પીતા રહો.
શરીરના ખુલ્લા ભાગોની કાળજી ન રાખવી
શિયાળામાં તડકો સેકતી વખતે ઘણા લોકો હાથ, પગ અને ચહેરો ખુલ્લા રાખે છે. તેમને લાગે છે કે જેટલો વધુ તડકો શરીર પર પડશે તેટલો ફાયદો થશે. પરંતુ લાંબો સમય તડકામાં ખુલ્લી ત્વચા રહેવાથી સનબર્ન અને બળતરા થઈ શકે છે. જે લોકોની ત્વચા ખૂબ જ સંવેદનશીલ હોય તેમણે વિશેષ કાળજી રાખવી જોઈએ. તડકામાં બેસતા પહેલા મોઇશ્ચરાઇઝર કે સનસ્ક્રીન લગાવવું અને જરૂર જણાય તો ટોપી પહેરવી.
