મધ્ય પૂર્વના યુદ્ધ વચ્ચે ભારત મિત્ર દેશોને બ્રહ્મોસથી સજ્જ નેક્સ્ટ જનરેશન યુદ્ધજહાજો વેચાશે
નવી દિલ્હી, 31 માર્ચ 2026: મધ્ય પૂર્વમાં ચાલી રહેલા સંઘર્ષ અને દરિયાઈ સુરક્ષાના વધતા જોખમો વચ્ચે ભારતે પોતાની સંરક્ષણ રણનીતિમાં એક મોટું ડગલું ભર્યું છે. ભારત હવે સ્વદેશી ટેકનોલોજીથી નિર્મિત અને ઘાતક બ્રહ્મોસ સુપરસોનિક ક્રૂઝ મિસાઈલથી સજ્જ ‘નેક્સ્ટ-જનરેશન મિસાઈલ વેસલ’ (એનજીએમવી) મિત્ર દેશોને નિકાસ કરવાની યોજના બનાવી રહ્યું છે. માર્ચ 2026 માં લેવાયેલો આ નિર્ણય ભારતને વૈશ્વિક સંરક્ષણ નિકાસકાર તરીકે નવી ઊંચાઈએ લઈ જશે.
ભારત તેના આધુનિક યુદ્ધજહાજોને આંતરરાષ્ટ્રીય માર્કેટમાં ઉતારીને હિંદ મહાસાગર અને તેનાથી આગળના વિસ્તારોમાં પોતાનો પ્રભાવ મજબૂત કરવા માંગે છે. સૂત્રોના જણાવ્યા અનુસાર, ઈન્ડોનેશિયા જેવા મહત્વના દેશોએ આ ઘાતક જહાજોમાં રસ દાખવ્યો છે. ખાસ કરીને હોર્મુઝની સામુદ્રધુની અને લાલ સમુદ્રમાં વધતા તણાવને જોતા, ઘણા દેશો હવે મોંઘા અને વિશાળ યુદ્ધજહાજોને બદલે નાના પરંતુ અત્યંત વેધક હથિયારો શોધી રહ્યા છે.
એનજીએમવી યુદ્ધજહાજની વિશેષતાઓ તેને અન્ય જહાજો કરતા અલગ પાડે છે. આશરે 1,450 ટન વજન ધરાવતું આ જહાજ 8 બ્રહ્મોસ મિસાઈલથી સજ્જ છે, જે દુશ્મનના જહાજો કે જમીની ઠેકાણાઓને લાંબા અંતરથી ચોકસાઈપૂર્વક નષ્ટ કરી શકે છે. ડ્રોન અને મિસાઈલ હુમલાઓથી બચવા માટે તેમાં 24 VL-SRSAM મિસાઈલ, 76mm ગન અને AK-630M જેવા અત્યાધુનિક ડિફેન્સ સિસ્ટમ્સ લગાવાયેલા છે. આ જહાજની વિશેષ ડિઝાઇન તેને રડારની નજરમાં આવતા રોકે છે, જે સંવેદનશીલ દરિયાઈ વિસ્તારોમાં ઓપરેશન માટે આશીર્વાદરૂપ છે.
ભારતીય નૌસેના માટે આશરે રૂ. 9,804 કરોડના ખર્ચે આવા 6 જહાજો તૈયાર કરવામાં આવી રહ્યા છે, જેની ડિલિવરી 2027 થી શરૂ થશે. આ જહાજ 35 નોટ્સની ઝડપ ધરાવે છે અને 2,800 નોટિકલ માઈલ સુધી સતત મિશન પર રહી શકે છે. દરેક જહાજમાં 80 થી 90 ક્રૂ મેમ્બર તૈનાત હશે. નિષ્ણાતો માને છે કે મધ્ય પૂર્વના યુદ્ધને કારણે ઊર્જા સપ્લાય અને દરિયાઈ વેપાર પર જોખમ વધ્યું છે. ભારતનું આ મિસાઈલ વેસલ એક કિફાયતી પરંતુ શક્તિશાળી વિકલ્પ છે. આ પ્રોજેક્ટ દ્વારા ભારત માત્ર પોતાની નૌસેનાનું આધુનિકીકરણ જ નથી કરી રહ્યું, પરંતુ ‘મેક ઇન ઇન્ડિયા’ હેઠળ વિશ્વના સંરક્ષણ બજારમાં એક વિશ્વસનીય ભાગીદાર તરીકે ઉભરી રહ્યું છે. ટૂંકમાં, વૈશ્વિક અસ્થિરતા વચ્ચે ભારત પોતાની રણનીતિક કુશળતાથી સંરક્ષણ નિકાસને નવી દિશા આપી રહ્યું છે.
આ પણ વાંચોઃ આતંકી શબ્બીરની તપાસમાં ચોંકાવનારો ઘટસ્ફોટ, મંદિરો ઉપર કરવાનો હતો હુમલો
