દિલ્હી : વડાપ્રધાન નરેન્દ્ર મોદી આવતા મહિને અમેરિકાના પ્રવાસે જઈ રહ્યા છે, તેના એક મહિના પહેલા જ અમેરિકાએ ધાર્મિક લઘુમતીઓને લઈને ભારત પર નિશાન સાધ્યું છે. યુએસ સ્ટેટ ડિપાર્ટમેન્ટે સોમવારે ધાર્મિક સ્વતંત્રતા પર એક રિપોર્ટ જાહેર કર્યો છે, જેમાં ભારતમાં લઘુમતીઓ વિરુદ્ધ હિંસાની 20 થી વધુ ઘટનાઓનો ઉલ્લેખ કરવામાં આવ્યો છે. રિપોર્ટના સંદર્ભમાં અમેરિકાના એક વરિષ્ઠ અધિકારીએ કહ્યું કે અમેરિકા ઈચ્છે છે કે ભારત ચાલી રહેલી ધાર્મિક હિંસાની નિંદા કરે.
15 મેના રોજ બહાર પાડવામાં આવેલ ધાર્મિક સ્વતંત્રતા પરના યુએસ વાર્ષિક અહેવાલમાં ભારતમાં મુસ્લિમો અને ખ્રિસ્તીઓ સહિત ધાર્મિક લઘુમતીઓ સામેના હુમલાઓની યાદી આપવામાં આવી છે.
અહેવાલ મુજબ, એક વરિષ્ઠ અમેરિકી અધિકારીએ નામ ન આપવાની શરતે પત્રકારો સાથે વાત કરતા અહેવાલના સંદર્ભમાં કહ્યું કે તેઓ ભારતમાં સતત થઈ રહેલી ધાર્મિક હિંસાથી દુખી છે.
અધિકારીએ કહ્યું, “આ ચિંતાઓના સંદર્ભમાં અમે સરકારને હિંસાની નિંદા કરવા અને ધાર્મિક લઘુમતીઓ પ્રત્યે અમાનવીય નિવેદનો કરનારાઓને જવાબદાર ઠેરવવા માટે પ્રોત્સાહિત કરીએ છીએ.”
અધિકારીએ કહ્યું કે તેઓ આ અંગે તેમના ભારતીય સમકક્ષો સાથે વાત કરશે. તેમણે કહ્યું, “અમે અમારા નાગરિક સમાજના ભાગીદારો અને પત્રકારો સાથે જમીન પર કામ કરવાનું ચાલુ રાખીશું જેઓ આમાંના કેટલાક દુરુપયોગના દસ્તાવેજીકરણ માટે દરરોજ કામ કરી રહ્યા છે,”
મીડિયા અને હિમાયતી જૂથોના સંશોધન પર આધારિત યુએસ સ્ટેટ ડિપાર્ટમેન્ટના અહેવાલમાં ગુજરાતમાં હિંદુઓ પર હુમલાના આરોપમાં ઘરો તોડવા અને મુસ્લિમોને જાહેરમાં માર મારવા અંગે ચિંતા વ્યક્ત કરવામાં આવી છે.
રિપોર્ટમાં યોગી આદિત્યનાથની સરકાર હેઠળ ઉત્તર પ્રદેશમાં કેટલાક મુસ્લિમોના ઘરો પર બુલડોઝરની કાર્યવાહીનો પણ ઉલ્લેખ છે. આ સાથે 2002ના બિલકિસ બાનો ગેંગરેપના 11 દોષિતોની મુક્તિનો પણ રિપોર્ટમાં ઉલ્લેખ કરવામાં આવ્યો છે.
