વૈશ્વિક તેલ બજારમાં મોટી હલચલ: ઓપેક દેશો મે મહિનાથી ક્રૂડ ઓઈલનું ઉત્પાદન વધારશે
રિયાધ, 6 એપ્રિલ 2026: વૈશ્વિક ઊર્જા બજારમાં સ્થિરતા જાળવી રાખવા માટે આઠ અગ્રણી ઓપેક પ્લસ દેશોએ આગામી મે 2026થી ક્રૂડ ઓઈલના ઉત્પાદનમાં વ્યૂહાત્મક વધારો કરવાનો મહત્વનો નિર્ણય લીધો છે. 5 એપ્રિલ 2026ના રોજ મળેલી વર્ચ્યુઅલ બેઠક બાદ આ દેશોએ કુલ 2,06,000 બેરલ પ્રતિ દિવસ (kbd)ઉત્પાદન વધારવાની જાહેરાત કરી છે. આ વધારામાં સાઉદી અરેબિયા અને રશિયાનો હિસ્સો 60 ટકાથી વધુ રહેશે.
પેટ્રોલિયમ નિકાસ કરતા દેશોના સંગઠન (OPEC) દ્વારા જારી કરાયેલ અખબારી યાદી મુજબ, આ વધારો અગાઉ અમલી કરાયેલા સ્વૈચ્છિક કાપમાં કરવામાં આવેલ એડજસ્ટમેન્ટ છે. એપ્રિલ 2023માં જાહેર કરાયેલા 1.65 મિલિયન બેરલ પ્રતિ દિવસના કાપમાંથી હવે 2,06,000 બેરલ તેલ બજારમાં પાછું લાવવામાં આવશે. બજારની બદલાતી પરિસ્થિતિઓને ધ્યાનમાં રાખીને આ પ્રક્રિયા તબક્કાવાર રીતે હાથ ધરાશે. સાઉદી અરેબિયાએ નવો ઉત્પાદન લક્ષ્યાંક 10228, રશિયાએ 9699, ઈરાકએ 4326, યુએઈએ 3447, કુવૈતએ 2612, કઝાકિસ્તાનએ 1589, અલ્જીરિયાએ 983 અને ઓમાનએ 821 kbd રાખ્યો છે.
ઉત્પાદનના આંકડાઓ ઉપરાંત, ઓપેક પ્લસ જૂથે આંતરરાષ્ટ્રીય ઊર્જા સપ્લાય ચેઈન અને દરિયાઈ શિપિંગ માર્ગોની સુરક્ષા અંગે ગંભીર ચિંતા વ્યક્ત કરી છે. ઊર્જા બુનિયાદી માળખા પરના હુમલાઓને કારણે થતા નુકસાનને પુનઃસ્થાપિત કરવું અત્યંત ખર્ચાળ અને સમય માંગી લેતું હોય છે, જેની સીધી અસર વૈશ્વિક બજાર પર પડે છે. જૂથે સ્પષ્ટ કર્યું કે આંતરરાષ્ટ્રીય જળમાર્ગોમાં કોઈપણ અવરોધ બજારમાં અસ્થિરતા લાવે છે, જે ગ્રાહકો અને ઉત્પાદકો બંને માટે નુકસાનકારક છે.
સાઉદી અરેબિયા અને રશિયા સહિતના ભાગીદાર દેશોએ ભાર મૂક્યો છે કે તેઓ બજારની સ્થિતિનું સતત નિરીક્ષણ કરશે. આ ઉત્પાદન વધારવાની પ્રક્રિયા લવચીક રાખવામાં આવી છે. જો વૈશ્વિક સંજોગો બદલાય, તો આ વધારાને રોકવા અથવા પાછો ખેંચવાનો વિકલ્પ પણ ખુલ્લો રખાયો છે. આગામી સમયમાં ઉત્પાદન શિસ્તની દેખરેખ માટે દેશો દર મહિને બેઠક કરશે. હવે પછીની મહત્વની સમીક્ષા બેઠક 3 મે, 2026 ના રોજ નિર્ધારિત કરવામાં આવી છે.
આ પણ વાંચોઃ જગ્ગી હત્યાકાંડ: છત્તીસગઢ હાઈકોર્ટે પૂર્વ CMના પુત્ર અમિત જોગીને આજીવન કેદની સજા ફરમાવી
