દહેરાદુન: ઉત્તરાખંડના મુખ્યમંત્રી પુષ્કર સિંહ ધામીએ સોમવારે કહ્યું કે રાજ્યમાં ભારે વરસાદને જોતા ચારધામ યાત્રા બે દિવસ માટે સ્થગિત કરવામાં આવી છે. અહીં જારી કરાયેલા એક સત્તાવાર નિવેદન અનુસાર, રાજ્યના ઉચ્ચ અધિકારીઓ સાથેની બેઠકમાં મુખ્યમંત્રીએ જણાવ્યું હતું કે અવિરત વરસાદ અને તેના કારણે સર્જાયેલી પરિસ્થિતિને ધ્યાનમાં રાખીને ચારધામ યાત્રાને બે દિવસ માટે સ્થગિત કરવામાં આવી છે.
આ દરમિયાન, મુખ્યમંત્રીએ તમામ શ્રદ્ધાળુઓને હવામાનની આગાહીને ધ્યાનમાં લીધા પછી જ યાત્રા કાઢવાની અપીલ કરી હતી. આ દિવસોમાં રાજ્યમાં બદ્રીનાથ, કેદારનાથ, ગંગોત્રી અને યમુનોત્રી મંદિરોની યાત્રા ચાલી રહી છે અને દેશ-વિદેશથી મોટી સંખ્યામાં શ્રદ્ધાળુઓ આ તીર્થો પર પહોંચી રહ્યા છે.આ દરમિયાન ધામીએ અધિકારીઓને રાજ્યના વિવિધ વિસ્તારોમાં ભારે વરસાદને ધ્યાનમાં રાખીને એલર્ટ મોડ પર રહેવાની સૂચના પણ આપી હતી. તેમણે અતિવૃષ્ટિથી પ્રભાવિત વિસ્તારો અને ત્યાં કરવામાં આવી રહેલા રાહત અને બચાવ કાર્ય વિશે પણ માહિતી મેળવી હતી.
CM ધામીએ અધિકારીઓને એ સુનિશ્ચિત કરવા કહ્યું કે રાજ્યમાં જ્યાં પણ મૂશળધાર વરસાદને કારણે નુકસાન થયું છે, અસરગ્રસ્તોને ધોરણો મુજબ શક્ય તેટલી વહેલી તકે વળતરની રકમ મળે. તેમણે રાજ્યમાં અતિવૃષ્ટિને કારણે થયેલા નુકસાનનું સંપૂર્ણ મૂલ્યાંકન કરવા પણ જણાવ્યું હતું. મુખ્યમંત્રીએ જિલ્લા મેજિસ્ટ્રેટને સૂચના આપી હતી કે જિલ્લા વહીવટીતંત્ર અને રાહત કાર્યમાં લાગેલી તમામ ટીમોને 24 કલાક એલર્ટ મોડ પર રાખવામાં આવે.
