HomeગુજરાતીગુજરાતPM નરેન્દ્ર મોદી આગામી 31મી માર્ચે ગુજરાતની મુલાકાતે આવશે

PM નરેન્દ્ર મોદી આગામી 31મી માર્ચે ગુજરાતની મુલાકાતે આવશે

ગાંધીનગર, 22 માર્ચ 2026: PM Narendra Modi will visit Gujarat on March 31st રાજ્યમાં સ્થાનિક સ્વરાજની ચૂંટણી નજીક છે. ત્યારે રાજકીય નેતાઓની ગુજરાતની મુલાકાતો વધતી જાય છે. અગાઉ આમ આદમી પાર્ટીના અરવિંદ કેરિવાલ તેમજ ઔવસી ગુજરાતની મુલાકાતે આવી ગયા છે. કોંગ્રેસના રાહુલ ગાંધી પણ વડોદરાની મુલાકાતે આવી રહ્યા છે. ત્યારે વડાપ્રધાન નરેન્દ્ર મોદી પણ આગામી 31મી માર્ચે ગુજરાતના એક દિવસીય મહત્વપૂર્ણ પ્રવાસે આવી રહ્યા છે.

વડાપ્રધાન નરેન્દ્ર મોદીનો હજુ સત્તાવાર કાર્યક્રમ જાહેર થયો નથી. પણ સૂત્રોના કહેવા મુજબ વડાપ્રધાન મોદી 31મી માર્ચે ગુજરાતની મુલાકાતે આવી રહ્યા છે. 31મી માર્ચે મહાવીર જન્મ કલ્યાણક દિવસના અવસરે વડાપ્રધાન મોદીની મુલાકાત દરમિયાન તેઓ ગાંધીનગર, અમદાવાદ અને નવનિર્મિત વાવ-થરાદ જિલ્લામાં વિવિધ વિકાસલક્ષી પ્રકલ્પોનું લોકાર્પણ અને ખાતમુહૂર્ત કરશે. રાજ્ય સરકાર અને વહીવટી તંત્ર દ્વારા આ મુલાકાતને લઈને તૈયારીઓ તેજ કરી દેવામાં આવી છે. વડાપ્રધાનનો મુખ્ય કાર્યક્રમ ગાંધીનગરના કોબા વિસ્તારમાં આવેલા ‘મહાવીર આરાધના કેન્દ્ર’ ખાતે યોજાશે. અહીં નિર્મિત અત્યાધુનિક મ્યુઝિયમનું વડાપ્રધાનના હસ્તે ઉદ્ઘાટન કરવામાં આવશે. આ મ્યુઝિયમ ધાર્મિક અને સાંસ્કૃતિક વારસાને આધુનિક ટેકનોલોજી સાથે રજૂ કરશે તેવી અપેક્ષા છે. આ સ્થળ ભાજપના પ્રદેશ કાર્યાલય ‘શ્રી કમલમ’ની નજીક હોવાથી સુરક્ષા એજન્સીઓ દ્વારા સમગ્ર વિસ્તારમાં ચુસ્ત બંદોબસ્ત ગોઠવવામાં આવી રહ્યો છે. વડાપ્રધાનના રૂટનું નિરીક્ષણ કરીને જરૂરી સુરક્ષા વ્યવસ્થા સુનિશ્ચિત કરવામાં આવી રહી છે.

અમદાવાદ જિલ્લામાં વડાપ્રધાન સાણંદ જીઆઈડીસી ખાતે ઔદ્યોગિક વિકાસને પ્રોત્સાહન આપતા વધુ એક સેમિકન્ડક્ટર યુનિટનું લોકાર્પણ કરશે. ગુજરાતને સેમિકન્ડક્ટર ક્ષેત્રે ગ્લોબલ હબ બનાવવા માટે આ પ્રોજેક્ટ મહત્વપૂર્ણ માનવામાં આવી રહ્યો છે. થોડા સમય પહેલાં જ વડાપ્રધાન માઇક્રોન કંપનીના પ્રોજેક્ટ માટે ગુજરાત આવ્યા હતા, અને હવે નવા યુનિટના પ્રારંભથી રાજ્યમાં ઇલેક્ટ્રોનિક્સ અને હાઈ-ટેક મેન્યુફેક્ચરિંગ ક્ષેત્રે નવી તકો ઊભી થશે તેવી આશા વ્યક્ત કરવામાં આવી રહી છે. મુલાકાતના અંતિમ તબક્કામાં વડાપ્રધાન વાવ-થરાદ જિલ્લાની મુલાકાત લે તેવી શક્યતા છે. અહીં તેઓ બનાસ ડેરીના નવા પ્લાન્ટનું ઉદ્ઘાટન કરશે અને મોટી જનસભાને સંબોધશે. આ કાર્યક્રમ નવા એરપોર્ટ નજીક યોજાય તેવી શક્યતા છે. સ્થાનિક સ્તરે કાર્યક્રમને સફળ બનાવવા માટે તૈયારીઓ જોરશોરથી ચાલી રહી છે, અને મોટી સંખ્યામાં લોકો ઉપસ્થિત રહે તેવી શક્યતા વ્યક્ત કરવામાં આવી રહી છે.

spot_img
spot_img
સંબંધિત લેખો
spot_img
spot_img

Most Popular

spot_img