શ્રીનગર, 01 ઓગસ્ટ 2026: જમ્મુ-કાશ્મીરના કુલગામ જિલ્લામાં બે મજૂરોની કાયરતાપૂર્ણ હત્યા અંગે મુખ્યમંત્રી ઉમર અબ્દુલ્લાએ ઊંડો શોક અને ભારે રોષ વ્યક્ત કર્યો છે. નિર્દોષ લોકોની હત્યાની આકરી શબ્દોમાં નિંદા કરતા મુખ્યમંત્રીએ શોકગ્રસ્ત પરિવારો પ્રત્યે સંવેદના વ્યક્ત કરી છે. તેમણે અસરગ્રસ્ત પરિવારોને આર્થિક સહાય અને ટેકો પૂરો પાડવા માટે એક નોંધપાત્ર આર્થિક પેકેજની જાહેરાત કરી છે. મુખ્યમંત્રી કાર્યાલયે સોશિયલ મીડિયા પ્લેટફોર્મ ‘X’ પર આ માહિતી શેર કરી છે.
10-10 લાખના વળતરની જાહેરાત
મુખ્યમંત્રી કાર્યાલયે ટ્વીટ કર્યું કે મુખ્યમંત્રીએ કુલગામમાં બે મજૂરોની કાયરતાપૂર્ણ હત્યાની સખત નિંદા કરી છે અને નિર્દોષ લોકોના જીવ ગુમાવવા બદલ ઊંડો શોક વ્યક્ત કર્યો છે. તેમણે મૃતકોના નજીકના સંબંધીઓ (આશ્રિતો) માટે મુખ્યમંત્રી રાહત ભંડોળમાંથી પ્રત્યેકને 10 લાખની સહાય રાશિ આપવાની જાહેરાત કરી છે.
આ સહાય જિલ્લા વહીવટીતંત્ર દ્વારા આપવામાં આવતી 6 લાખની તાત્કાલિક સહાય ઉપરાંતની હશે. મુખ્યમંત્રીએ શોકગ્રસ્ત પરિવારો પ્રત્યે હૃદયપૂર્વકની સંવેદના વ્યક્ત કરી હતી અને પુનરોચ્ચાર કર્યો હતો કે સરકાર આ મુશ્કેલ સમયમાં તેમની સાથે મક્કમતાથી ઊભી છે.
બે મજૂરોનીનામ પૂછીને હત્યા
દક્ષિણ કાશ્મીરના કુલગામમાં આવેલી એક ઈંટની ભઠ્ઠી પર કામ કરતા છત્તીસગઢના બે મજૂરોને આતંકવાદીઓએ તેમના નામ પૂછ્યા બાદ ગોળી મારીને હત્યા કરી નાખી. આ હુમલામાં બંને મજૂરોનાં મોત નીપજ્યાં હતાં. આતંકવાદીઓ ઘટનાસ્થળેથી ફરાર થઈ ગયા હતા; સુરક્ષા દળોએ તેમને પકડવા માટે સર્ચ ઓપરેશન શરૂ કર્યું છે અને આસપાસના વિસ્તારોમાં ચેકપોઈન્ટ્સ ગોઠવ્યા છે.
વધુ વાંચો: જાપાનના આઓમોરી પ્રીફેક્ચરમાં 5.8ની તીવ્રતાનો ભૂકંપ આવ્યો
