ઓસ્ટ્રેલિયા ક્રિકેટ ટીમના વિસ્ફોટક બેસ્ટમેન વોર્નરે ટેસ્ટ બાદ વન-ડેમાંથી લીધો સન્યાસ
સિડની: ઓસ્ટ્રેલિયાના દિગ્ગજ બેટ્સમેન ડેવિડ વોર્નરે સોમવારે તેની અંતિમ ટેસ્ટ મેચ રમતા પહેલા વન-ડે ઈન્ટરનેશનલ ક્રિકેટમાંથી નિવૃત્તિની જાહેરાત કરી હતી પરંતુ તે ઓસ્ટ્રેલિયા તરફથી T20 ક્રિકેટમાં રમવાનું ચાલુ રાખશે. જોકે, 37 વર્ષીય ઓપનિંગ બેટ્સમેને સ્પષ્ટતા કરી હતી કે, જો ઓસ્ટ્રેલિયન ટીમને 2025માં યોજાનારી ચેમ્પિયન્સ ટ્રોફી માટે તેની જરૂર પડશે તો તે પસંદગી માટે ઉપલબ્ધ રહેશે. તેના હોમ ગ્રાઉન્ડ સિડની ક્રિકેટ ગ્રાઉન્ડ પર તેની અંતિમ ટેસ્ટ મેચ રમતા પહેલા વોર્નરે ખુલાસો કર્યો હતો કે, નવેમ્બરમાં ભારત સામે ઓસ્ટ્રેલિયાની વર્લ્ડ કપ ફાઇનલ 50 ઓવરના ફોર્મેટમાં તેની છેલ્લી મેચ હતી.
વોર્નરે એક પ્રેસ કોન્ફરન્સમાં કહ્યું હતું કે, હું ચોક્કસપણે વન-ડે ક્રિકેટમાંથી પણ નિવૃત્તિ લઈ રહ્યો છું. ભારતમાં જીતવા માટે (2023માં ભારતમાં) વર્લ્ડ કપ (50-ઓવર) દરમિયાન મેં વાત કરી હતી. આ ખરેખર એક મોટી સિદ્ધિ છે.” તેણે કહ્યું, “તેથી આજે મેં આ ફોર્મેટમાંથી નિવૃત્તિ લેવાનો નિર્ણય કર્યો છે જે મને વિશ્વભરની અન્ય લીગમાં રમવાની તક પણ આપશે. હું જાણું છું કે ચેમ્પિયન્સ ટ્રોફી ટૂંક સમયમાં યોજાશે. જો હું આ બે વર્ષમાં સારું ક્રિકેટ રમતો રહીશ અને તેઓ મારી જરૂરિયાત અનુભવશે તો હું પસંદગી માટે ઉપલબ્ધ થઈશ.
વિશ્વના વિસ્ફોટક બેટ્સમેનોમાંના એક વોર્નરના નામે બે ODI વર્લ્ડ કપ ટાઇટલ છે, જેમાં વર્લ્ડ કપ 2023માં ભારત સામેની અંતિમ જીત પણ સામેલ છે. આ ટૂર્નામેન્ટમાં તેણે ઓસ્ટ્રેલિયા માટે સૌથી વધુ રન બનાવ્યા હતા. ડાબોડી ઓપનિંગ બેટ્સમેન વોર્નરે 2009માં હોબાર્ટમાં સાઉથ આફ્રિકા સામે તેની ODI કારકિર્દીની શરૂઆત કરી હતી. તેણે પોતાની કારકિર્દીમાં 161 ODI મેચ રમી જેમાં તેણે 45.30ની એવરેજથી 6932 રન બનાવ્યા. આ ફોર્મેટમાં તેના નામે 22 સદી અને 33 અડધી સદી પણ છે. ઓસ્ટ્રેલિયા માટે ODI ક્રિકેટમાં સૌથી વધુ રન બનાવનાર બેટ્સમેનોની યાદીમાં તે છઠ્ઠા સ્થાને છે.
ઓસ્ટ્રેલિયા માટે સૌથી વધુ સદી ફટકારનાર ખેલાડીઓની યાદીમાં વોર્નર રિકી પોન્ટિંગ પછી બીજા ક્રમે છે. પોન્ટિંગે વોર્નર કરતા 205 વધુ ઇનિંગ્સ રમી હતી. વોર્નરે અત્યાર સુધી 111 ટેસ્ટ મેચ રમી છે જેમાં તેના નામે 44.58ની એવરેજથી 8695 રન છે. ટેસ્ટ ક્રિકેટમાં તેના નામે 26 સદી અને 36 અડધી સદી છે.
