ઉનાળાની કાળઝાળ ગરમીમાં ચહેરો પડી ગયો છે ડલ? બસ, એક સ્પ્રે અને ત્વચા ખીલી ઉઠશે ગુલાબ જેવી!

ઉનાળાની શરૂઆત થતા જ ત્વચા સંબંધિત સમસ્યાઓ વધવા લાગે છે. અસહ્ય ગરમી અને પરસેવાના કારણે ચહેરો ચીકણો અને થાકેલો દેખાવો સામાન્ય વાત છે. મોંઘા બ્યુટી પ્રોડક્ટ્સ પાછળ ખર્ચ કરવાને બદલે ઘરે જ તૈયાર કરેલા નેચરલ ફેસ સ્પ્રે તમારી ત્વચામાં તરત જ નવી જાન ફૂંકી શકે છે. અહીં કેટલીક એવી કુદરતી વસ્તુઓ છે જે ડલ સ્કીનને ઇન્સ્ટન્ટ ગ્લો આપી ફ્રેશ રાખવામાં મદદ કરશે.

• ગુલાબજળ અને વિટામિન-E

ત્વચાને તાજગી આપવા માટે ગુલાબજળ વર્ષોથી સર્વશ્રેષ્ઠ માનવામાં આવે છે. જ્યારે પણ ચહેરો નિસ્તેજ લાગે, ત્યારે ફેસ વાઇપ્સથી સાફ કરી ગુલાબજળનો સ્પ્રે કરો. વધુ સારા પરિણામ માટે ગુલાબજળમાં ૧ કે ૨ વિટામિન-E ના કેપ્સ્યુલ ઉમેરી શકાય છે. તે સ્કીનને ટોન કરવાની સાથે ચમકદાર પણ બનાવે છે.

• કાકડી અને એલોવેરા

કાકડીનો રસ અને એલોવેરા જેલને મિશ્ર કરી એક સ્પ્રે બોટલમાં ભરી લો. આ બોટલને ફ્રીજમાં રાખો. ગરમીમાં જ્યારે પણ બહારથી આવો ત્યારે આ ઠંડા મિશ્રણનો ચહેરા પર છંટકાવ કરો. આનાથી ત્વચા હાઈડ્રેટ થશે અને ગરમીને કારણે આવતી બળતરામાં પણ રાહત મળશે.

• ગ્રીન-ટી વોટર

ગ્રીન-ટીને પાણીમાં ઉકાળી, તેને ઠંડુ કરીને બોટલમાં ભરી લો. ગ્રીન-ટીમાં રહેલા એન્ટી-ઓક્સિડન્ટ્સ ચહેરાને તરત જ ફ્રેશ બનાવે છે. આ સ્પ્રેના નિયમિત ઉપયોગથી ચહેરા પરના ડાઘ-ધબ્બા અને ખીલની સમસ્યામાં પણ ઘટાડો થાય છે, જેનાથી ત્વચા સાફ અને તેજસ્વી દેખાય છે.

• લીંબુ અને ફુદીનો

જેમની ત્વચા ઉનાળામાં ખૂબ જ ચીકણી (ઓઈલી) થઈ જતી હોય, તેમના માટે લીંબુ અને ફુદીનાનું પાણી ખૂબ ફાયદાકારક છે. પાણીમાં ફુદીનાના પાન ક્રશ કરીને નાખો અને તેમાં લીંબુનો રસ ઉમેરો. આ કુદરતી એસ્ટ્રિન્જન્ટ તરીકે કામ કરે છે અને ત્વચાના વધારાના તેલને નિયંત્રિત કરી તાજગી આપે છે.

• રાઈસ વોટર અને તુલસી

ચોખાનું પાણી ત્વચાને પોષણ આપે છે. તેમાં થોડો તુલસીનો રસ ઉમેરીને ચહેરા પર સ્પ્રે કરવાથી ત્વચા ‘ક્લીન એન્ડ ક્લિયર’ બને છે. તુલસીમાં રહેલા એન્ટી-બેક્ટેરિયલ ગુણો ડાઘ ઘટાડે છે, જ્યારે રાઈસ વોટર ત્વચાને કુદરતી ચમક આપે છે.

કોઈપણ સ્પ્રેનો ઉપયોગ કરતા પહેલા ચહેરાને સ્વચ્છ પાણીથી ધોઈ લેવો હિતાવહ છે. આ ઘરગથ્થુ ઉપચારો કેમિકલ મુક્ત હોવાથી ત્વચાને કોઈ નુકસાન પહોંચાડતા નથી.