ગાંધીનગરઃ ગુજરાતમાં કોરોનાના કેસમાં ધીમી ગતિએ વધારો થઈ રહ્યો છે, ત્યારે હવે 18 વર્ષથી વધુ વયના વ્યક્તિઓને મફતમાં કોરોનાની વેક્સિનનો ત્રીજો યાને બુસ્ટર ડોઝ આપવાનો આજે શુક્રવારથી પ્રારંભ કરાશે. સરકારી દવાખાના, પ્રાથિમિક આરોગ્ય કેન્દ્રોમાં વેક્સિનના ડોઝ માટેની વ્યવસ્થા કરવામાં આવી છે.
સૂત્રોના જણાવ્યા મુજબ દેશમાં 18 વર્ષથી ઉપરના તમામ લોકોને આજે 15મી જુલાઇથી કોરોનાના બુસ્ટર ડોઝ ફ્રીમાં મળશે. સરકારે આ બાબતે લીલીઝંડી આપી દીધી છે. તમામ સરકારી હોસ્પિટલમાં આજે 15 જુલાઈથી પ્રિકૉશન ડોઝ મળશે. જો કે ફ્રી ડોઝ આગામી 75 દિવસ માટે જ ઉપલબ્ધ હશે. હાલ દેશમાં કોરોના વેક્સિનનો પહેલો અને બીજો ડોઝ મફત મળે છે, જ્યારે બુસ્ટર ડોઝ માટે ચુકવણી કરવી પડતી હતી. હવે પ્રિકોશન ડોઝ પણ મફતમાં આપવામાં આવશે. ગુજરાતમાં અત્યાર સુધી 18 વર્ષથી ઉપરના 4.91 કરોડ લોકો બીજો ડોઝ લઇ ચુક્યા છે. આ તમામ લોકો પ્રિકોશન ડોઝ લઇ શકે છે જેમાંથી અત્યાર સુધી 43.37 લાખ લોકો પ્રિકોશન ડોઝ લઇ ચુક્યા છે. એટલે કે હજૂ 4.48 કરોડ લોકોને પ્રિકોશન ડોઝ લેવાનો બાકી છે. જ્યારે ફ્રીમાં પ્રિકોશન ડોઝ 75 દિવસ સુધી જ મળશે.
સૂત્રોના જણાવ્યા મુજબ રાજ્યમાં ગુરૂવારે કોરોનાના નવા 737 કેસ નોંધાયા હતા. જેની સામે 687 દર્દીઓએ કોરોનાને હરાવ્યો હતો. રાજ્યમાં એક્ટિવ કેસની સંખ્યા વધીને હવે 4247 થઇ ગઇ છે. જેમાંથી 3 દર્દીઓ વેન્ટિલેટર પર છે. અમદાવાદ શહેરમાં સૌથી વધારે 299 નવા કેસ નોંધાયા હતા. સુરતમાં નવા 75 નવા કેસ નોંધાયા હતા. રાજ્યમાં રીકવરી રેટ 98.78 ટકા છે.
