ભારત અને અખાતી દેશો હવે પોતાનો રસ્તો જાતે પસંદ કરવા સક્ષમ: ઋષિ સુનક

નવી દિલ્હી, 13 ઓક્ટોબર 2026: બ્રિટનના પૂર્વ પ્રધાનમંત્રી ઋષિ સુનકે મંગળવારે જણાવ્યું હતું કે, બદલાતી વૈશ્વિક વ્યવસ્થામાં ભારત અને અખાતી (ગલ્ફ) દેશો જેવા રાષ્ટ્રો હવે પોતાનો રસ્તો જાતે પસંદ કરવા સક્ષમ બન્યા છે. તેઓ દરેક મુદ્દે અમેરિકા કે ચીન સાથે સહમત થાય તે જરૂરી નથી. નવી દિલ્હી ખાતે યોજાયેલા ‘બ્લૂમબર્ગ ન્યૂ ઈકોનોમી ફોરમ 2026’ માં સંબોધન કરતા તેમણે ઉમેર્યું કે, વિશ્વમાં શક્તિ સંતુલન ઝડપથી બદલાઈ રહ્યું છે, જેના કારણે વૈશ્વિક રાજકારણ અને અર્થતંત્રમાં અનિશ્ચિતતા વધી રહી છે.

‘ધ એન્ડ ઓફ પ્રેડિક્ટેબિલિટી’ (અનિશ્ચિતતાનો યુગ) વિષય પર યોજાયેલી પેનલ ચર્ચામાં ઋષિ સુનકે જણાવ્યું કે, વિશ્વ હવે એ બહુપક્ષીય અને નિયમો આધારિત વ્યવસ્થાથી દૂર જઈ રહ્યું છે જેણે વૈશ્વિક અર્થતંત્રને આકાર આપ્યો હતો. તેમણે સ્પષ્ટ કર્યું કે અમેરિકી રાષ્ટ્રપતિ ડોનાલ્ડ ટ્રમ્પ આ બદલાવનું કારણ નથી, પરંતુ તેના લક્ષણ છે. વિશ્વ હવે કઈ નવી વ્યવસ્થા તરફ વધી રહ્યું છે તે હજુ અસ્પષ્ટ છે, જેનાથી ભૌગોલિક-રાજકીય (જીઓ-પોલિટિકલ) અનિશ્ચિતતા અને જોખમો નોંધપાત્ર રીતે વધ્યા છે.

સુનકે ભારપૂર્વક જણાવ્યું કે ચીન હવે આર્થિક, સૈન્ય અને તકનીકી ક્ષેત્રોમાં અમેરિકાની સમકક્ષ સ્પર્ધક તરીકે ઉભરી આવ્યું છે. વૈશ્વિક અર્થતંત્રમાં આ એક બહુ મોટો બદલાવ છે. ચીનની વધતી તાકાતે વિશ્વના શક્તિ સંતુલનને બદલી નાખ્યું છે અને તેની અસર આવનારા સમયમાં આંતરરાષ્ટ્રીય સંબંધો પર સ્પષ્ટપણે જોવા મળશે.

• ભારત અને અખાતી દેશો પોતાના હિતોને આપશે પ્રાથમિકતા

ભારત અને ગલ્ફ દેશોની વધતી સ્વતંત્ર ભૂમિકા પર ભાર મૂકતા સુનકે કહ્યું કે, આ દેશો હવે પોતાના હિતો મુજબ નિર્ણયો લેવા સક્ષમ છે. તેઓ દરેક વખતે અમેરિકા કે ચીનની પડખે નહીં ઊભા રહે, પરંતુ જે તેમના દેશ માટે યોગ્ય હશે તે જ કરશે. તેમણે આ અભિગમને નવી વૈશ્વિક વ્યવસ્થાની એક ઉભરતી અને મહત્વપૂર્ણ લાક્ષણિકતા ગણાવી હતી.

વિશ્વમાં વધતા સુરક્ષા સંકટ અંગે ચિંતા વ્યક્ત કરતા સુનકે નોંધ્યું કે, હાલમાં બીજા વિશ્વયુદ્ધ પછીના કોઈપણ સમયગાળા કરતાં વધુ સશસ્ત્ર સંઘર્ષો ચાલી રહ્યા છે. તેમણે વિશ્વભરમાં 61 સશસ્ત્ર સંઘર્ષોનો ઉલ્લેખ કરીને આ સ્થિતિને ગંભીર ગણાવી હતી. તેમણે કટાક્ષ કરતા ઉમેર્યું કે, જ્યારે તેઓ આ સંઘર્ષોથી ચિંતિત છે, ત્યારે રાષ્ટ્રપતિ ટ્રમ્પ કદાચ આ સ્થિતિને નોબેલ શાંતિ પુરસ્કાર જીતવાની 61 તકો તરીકે જોતા હશે.

• સૈન્ય ક્ષમતા અને તાકાતનું મહત્વ વધ્યું

ઋષિ સુનકે જણાવ્યું કે, વર્તમાન યુગમાં દેશો હવે સમજી રહ્યા છે કે તેમની આર્થિક સુરક્ષા, રાષ્ટ્રીય સુરક્ષા અને ટેકનોલોજીકલ ક્ષમતા એકબીજા સાથે જોડાયેલી છે. આ તમામ ક્ષેત્રોમાં વધતા જોખમો મળીને એક એવી વૈશ્વિક સ્થિતિનું નિર્માણ કરી રહ્યા છે જ્યાં અનિશ્ચિતતાઓ અને પડકારો સતત વધી રહ્યા છે.

‘બ્લૂમબર્ગ ન્યૂ ઈકોનોમી ફોરમ 2026’ નો આ સત્ર નવી દિલ્હીમાં 13 થી 15 ઓક્ટોબર દરમિયાન યોજાઈ રહ્યો છે, જેની આ વર્ષની થીમ ‘એ વર્લ્ડ ઈન પ્લે: ડિફાઈનિંગ ધ ન્યૂ લીવર્સ ઓફ પાવર’ છે. આ ચર્ચામાં ટાટા સન્સના ચેરમેન નટરાજન ચંદ્રશેખરન અને બ્લેકસ્ટોનના પ્રેસિડેન્ટ તેમજ સીઓઓ જોનાથન ગ્રે પણ સહભાગી બન્યા હતા.