ભારત-યુએસ મંત્રી સ્તરીય મંત્રણા સુરક્ષા સહયોગને મજબૂત કરવા પર ધ્યાન કેન્દ્રિત કરશે-વિદેશ વિભાગનું નિવેદન
દિલ્હી: ભારત અને અમેરિકાના વિદેશ અને સંરક્ષણ મંત્રીઓની મહત્વની બેઠક શુક્રવારે નવી દિલ્હીમાં યોજાશે. અગાઉ યુએસ સ્ટેટ ડિપાર્ટમેન્ટે બુધવારે કહ્યું હતું કે આ અઠવાડિયે નવી દિલ્હીમાં યોજાનારી ભારત-યુએસ 2+2 મંત્રી સ્તરીય વાટાઘાટો બંને દેશો વચ્ચે સુરક્ષા સહયોગને વધુ ગાઢ બનાવવા પર ધ્યાન કેન્દ્રિત કરશે. રક્ષા મંત્રી રાજનાથ અને વિદેશ મંત્રી જયશંકર 10 નવેમ્બરે નવી દિલ્હીમાં પાંચમી ભારત-યુએસ 2+2 મંત્રી સ્તરીય સંવાદ માટે યુએસ સ્ટેટ સેક્રેટરી એન્ટની બ્લિંકન અને સંરક્ષણ સચિવ લોયડ ઓસ્ટિનનું સ્વાગત કરશે.
સ્ટેટ ડિપાર્ટમેન્ટના ડેપ્યુટી પ્રવક્તા વેદાંત પટેલે પત્રકાર પરિષદમાં જણાવ્યું હતું કે, ભારત સાથે અમેરિકાની મજબૂત ભાગીદારી છે. એન્ટોની બ્લિંકન સંરક્ષણ પ્રધાન લોયડ ઓસ્ટિન સાથે ટુ પ્લસ ટુ સુરક્ષા વાટાઘાટો માટે નવી દિલ્હીની મુલાકાતે છે. અમને આશા છે કે આ સંવાદ બંને દેશો વચ્ચે સુરક્ષા સહયોગ અને ભાગીદારીને ગાઢ બનાવશે. આ ઉપરાંત અનેક વિષયો પર ચર્ચા થશે.
એક પ્રશ્નના જવાબમાં પટેલે જણાવ્યું હતું કે આ વર્ષની શરૂઆતમાં વડાપ્રધાન નરેન્દ્ર મોદીની અમેરિકા મુલાકાત દરમિયાન કેટલાક મુદ્દાઓ સ્પષ્ટપણે ઉઠાવવામાં આવ્યા હતા. તેથી બંને અમેરિકી મંત્રીઓ દિલ્હીમાં તેમના સમકક્ષો સાથે આ વિષયો પર સીધી વાતચીત કરવા આતુર છે.
ભારતીય વિદેશ મંત્રાલયે કહ્યું કે, ટુ પ્લસ ટુ વાટાઘાટોમાં સંરક્ષણ અને સુરક્ષા સહયોગ, ટેકનોલોજી સહયોગ અને લોકો વચ્ચેના સંબંધોના વ્યાપક પાસાઓમાં થઈ રહેલી પ્રગતિની ઉચ્ચ સ્તરીય સમીક્ષા કરવામાં આવશે.વિદેશ મંત્રાલયના જણાવ્યા અનુસાર,પ્રધાનોને આ વર્ષે જૂન અને સપ્ટેમ્બરમાં તેમની ચર્ચામાં વડા પ્રધાન નરેન્દ્ર મોદી અને રાષ્ટ્રપતિ જો બાઈડેન દ્વારા કલ્પના કરાયેલ ભારત-યુએસ ભાગીદારીના ભાવિ રોડમેપને આગળ વધારવાની તક મળશે. બંને પક્ષો સમકાલીન પ્રાદેશિક મુદ્દાઓ પર પણ ચર્ચા કરશે અને બહુપક્ષીય મંચો અને ક્વાડ જેવા ફ્રેમવર્ક દ્વારા સહકાર વધારવા માટે વહેંચાયેલ પ્રાથમિકતાઓ પર પણ ચર્ચા કરશે.
